Սեպտեմբերի 7-ին երկնքում կարելի է տեսնել հինգ երկնային մարմինների տպավորիչ «հանդիպումը»

Սեպտեմբերի 7-ի գիշերը Լուսինը, Մարսը, Յուպիտերը և Երկվորյակներ համաստեղության երկու պայծառ աստղերը՝ Կաստորն ու Պոլուքսը, երկնքում կձևավորեն գեղեցիկ տեսանելի խումբ։ Այս մասին ՌԻԱ Նովոստիին հայտնել է Պերմի պլանետարիումի դասախոս Վիտալի Ֆրանցևը։

Նրա խոսքով՝ երևույթը դիտելու համար լավագույն ժամանակը սեպտեմբերի 7-ն է, իսկ երկնային մարմինները պետք է փնտրել երկնքի արևելյան հատվածում։

Այդ ժամանակ Լուսնի սկավառակի լուսավորվածությունը կկազմի մոտ 21%, և այն տեսողականորեն շատ կմոտենա Մարսին։ Յուպիտերն իր պայծառությամբ համեմատելի կլինի Սիրիուսի՝ գիշերային երկնքի ամենապայծառ աստղի հետ, իսկ Մարսը մոտ հինգ անգամ ավելի թույլ կերևա։