Պուտինը հայտարարել է Ուկրաինայի հարվածներին «հայելային պատասխան» տալու մասին

ՌԴ նախագահ Վլադիմիր Պուտինը հայտարարել է, որ ուկրաինական զինված ուժերը հարվածներ են հասցնում Ռուսաստանի քաղաքացիական օբյեկտներին, ինչի պատճառով Մոսկվան, նրա խոսքով, ստիպված է եղել «հայելային պատասխան» տալ։ Այս մասին նա ասել է Արևելյան տնտեսական համաժողովի լիագումար նիստում։

«Մենք ելնում էինք այն համոզմունքից, որ նույնիսկ զինված հակամարտության պայմաններում քաղաքացիական օբյեկտները չպետք է հարձակման թիրախ դառնան։ Բայց այս հարցում մենք սխալվեցինք։ Մեր հակառակորդը, ցավոք, այլ կերպ է մտածում և սկսել է հարվածներ հասցնել քաղաքացիական, բացառապես քաղաքացիական օբյեկտներին։ Ինչպես տեսնում եք, մենք ստիպված եղանք հայելային պատասխան տալ»,- ասել է Պուտինը։

ՌԴ նախագահը նաև հայտնել է, որ սեպտեմբերի 2-ին Ուկրաինայի զինված ուժերը փորձել են հարվածել ռուսական երեք նավթավերամշակման գործարանների։

Ավելի վաղ Կրեմլի խոսնակ Դմիտրի Պեսկովը հայտարարել էր, որ ռուսական ուժերը շարունակում են հարվածներ հասցնել Ուկրաինայի ռազմական և, իր ձևակերպմամբ, «ռազմականին հարակից» ենթակառուցվածքներին։