Գիտնականը նշել է՝ որ սև խոռոչներն են Տիեզերքում ամենատարածվածը

Տիեզերքում ամենատարածվածներից են աստղային զանգվածի սև խոռոչները, որոնց զանգվածը կարող է լինել Արեգակի զանգվածից մոտ 3-ից մինչև 100 և նույնիսկ մի քանի հարյուր անգամ մեծ։ Այս մասին ՌԻԱ Նովոստիին հայտնել է Ռուսաստանի գիտությունների ակադեմիայի Ֆիզիկայի ինստիտուտի Աստղատիեզերական կենտրոնի գիտաշխատող Վյաչեսլավ Ավդեևը։

Նրա խոսքով՝ նման սև խոռոչներն առաջանում են զանգվածեղ աստղերի կոլապսի՝ փլուզման հետևանքով։ Եթե կրկնակի աստղային համակարգում երկու աստղերն էլ վերածվեն սև խոռոչների, ապա հետագայում դրանք կարող են միաձուլվել՝ ձևավորելով ավելի մեծ զանգված ունեցող սև խոռոչ։

Գոյություն ունեն նաև գերզանգվածային սև խոռոչներ, որոնց զանգվածը միլիոնավոր կամ նույնիսկ միլիարդավոր անգամ գերազանցում է Արեգակի զանգվածը։ Օրինակ՝ Ծիր Կաթին գալակտիկայի կենտրոնում գտնվող սև խոռոչի զանգվածը գերազանցում է Արեգակի զանգվածը մոտ 4 միլիոն անգամ։ Գիտնականը միաժամանակ ընդգծել է, որ սխալ է կարծել, թե ամբողջ գալակտիկան պտտվում է կենտրոնական սև խոռոչի շնորհիվ։

Ավդեևի խոսքով՝ քննարկվում է նաև Տիեզերքի վաղ փուլերում հնարավոր առաջացած առաջնային սև խոռոչների գոյությունը, սակայն դրանց առկայության համոզիչ դիտողական ապացույցներ դեռ չկան։ Նա հավելել է, որ մութ նյութը նման սև խոռոչներից կազմված լինելու վարկածը ևս ներկայիս դիտարկումներով ավելի քիչ հավանական է համարվում։