Սրտի շուրջ կուտակված ավելորդ ճարպը կարող է դանդաղեցնել վիրահատությունից հետո վերականգնումը

Սրտի շուրջ ճարպային հյուսվածքի ավելցուկը կարող է բացասաբար ազդել սրտի վիրահատությունից հետո հիվանդների վերականգնման վրա։ Նման եզրակացության են եկել Կեմերովոյի Սրտանոթային հիվանդությունների համալիր խնդիրների գիտահետազոտական ինստիտուտի գիտնականները։

Հետազոտությանը մասնակցել է 35-ից 75 տարեկան 148 մարդ, որոնք վիրահատվել էին միտրալ փականի աշխատանքի խանգարման պատճառով։ Գիտնականները պարզել են, որ սրտի շուրջ ավելի քան 115 մլ ճարպային հյուսվածք ունեցող հիվանդների մոտ դեռ վիրահատությունից առաջ սրտի ռիթմի խանգարումները երկու անգամ ավելի հաճախ էին հանդիպում, իսկ սրտի որոշ հատվածների աշխատանքն ավելի վատ էր։

Վիրահատությունից մեկ տարի անց ավելորդ ճարպ չունեցող հիվանդների մոտ նկատվել է սրտի աշխատանքի և կառուցվածքի զգալի բարելավում, մինչդեռ մեծ քանակությամբ ճարպային կուտակումներ ունեցողների մոտ նման արտահայտված դրական փոփոխություններ չեն արձանագրվել։

Հետազոտության համաձայն՝ սրտի շուրջ ճարպի կուտակումը կապված է նաև ինսուլտի, սրտի իշեմիկ հիվանդության և վիրահատությունից հետո կրկին հիվանդանոց տեղափոխվելու ավելի բարձր ռիսկի հետ։ Արդյունքները հրապարակվել են Journal of Cardiovascular Development and Disease գիտական ամսագրում։