Հայաստանի դեմ կիրառված իսրայելական LORA հրթիռները փորձարկվել են գերմանական ռազմանավից

Իսրայելական IAI ընկերության արտադրության LORA (Long-Range Artillery Missile) բալիստիկ հրթիռները փորձարկվել են Գերմանիայի ռազմածովային ուժերի Sachsen-Anhalt F125 դասի ֆրեգատից։ Այս մասին գրում է The War Zone-ը (TWZ)։

Պարբերականի տվյալներով՝ սեպտեմբերի 2-ին ՆԱՏՕ-ի անդամ Գերմանիայի ռազմանավից արձակվել է առնվազն երկու LORA հրթիռ։ TWZ-ն նշում է, որ դրանց սպառազինության ընդունումը կարող է գերմանական նավատորմին հեռահար հարվածներ հասցնելու նոր հնարավորություն տալ։

LORA-ն նախկինում կիրառվել է նաև 2020 թվականի Արցախյան պատերազմի ընթացքում։ Ըստ հրապարակման՝ Ադրբեջանն այդ ժամանակ առաջին անգամ կիրառել է այս օպերատիվ-մարտավարական հրթիռային համակարգը՝ հարվածելով Ակարի գետի վրայի կամրջին, որը կապում էր Հայաստանը Արցախի հետ։

LORA-ի գործողության հեռահարությունը կազմում է մոտ 100-430 կմ, հրթիռի զանգվածը՝ շուրջ 1600 կգ։ Այն շարժվում է քվազիբալիստիկ հետագծով, իսկ հայտարարված հավանական շեղումը թիրախից մոտ 10 մետր է։