Ինչպես է փոխվել արդարադատության նախարարի տեղակալ Աննա Կարապետյանի ունեցվածքը մեկ տարում․ Ժողովուրդ

«Ժողովուրդ» օրաթերթը գրում է. ««Ժողովուրդ» օրաթերթը շարունակում է ուսումնասիրել պաշտոնատար անձանց գույքի, եկամուտների և ծախսերի վերաբերյալ հայտարարագրերը և դրանք ներկայացնել հանրությանը։ Այս անգամ ուսումնասիրել ենք ՀՀ արդարադատության նախարարի տեղակալ Աննա Կարապետյանի կենսագրությունն ու ունեցվածքը՝ պաշտոնը ստանձնելու պահից մինչև 2025 թվականը։ Աննա Կարապետյանը Արդարադատության նախարարի տեղակալի պաշտոնը ստանձնել է 2024 թվականի դեկտեմբերի 17-ին։ Մինչ այդ նա տարբեր պաշտոններ է զբաղեցրել պետական համակարգում և միջազգային կազմակերպություններում։ 2024 թվականի օգոստոսից Կարապետյանը եղել է ՄԱԿ-ի Զարգացման ծրագրի Ժողովրդավարական կառավարման բաժնի՝ արդարադատության ոլորտի համակարգող։ 2023-2024 թվականներին նա աշխատել է Արդարադատության նախարարության «Օրենսդրության զարգացման կենտրոն» հիմնադրամում՝ որպես միջազգային-իրավական հարցերով փորձագետ։

2022-2023 թվականներին Կարապետյանը եղել է Մարդու իրավունքների պաշտպանի աշխատակազմի միջազգային համագործակցության վարչության պետ։ Իսկ 2016-2022 թվականներին աշխատել է Արդարադատության նախարարության միջազգային իրավական համագործակցության վարչության արտաքին կապերի բաժնում՝ սկզբում որպես առաջին կարգի մասնագետ, ապա՝ առաջատար և գլխավոր մասնագետ, իսկ հետագայում՝ բաժնի պետ։ Ինչ ունեցվածք ուներ նախքան տեղակալի պաշտոնը ստանձնելը։ Աննա Կարապետյանի՝ պաշտոնը ստանձնելու օրվա դրությամբ ներկայացված հայտարարագրից պարզ է դառնում, որ այդ պահին նրա անունով եղել է Երևանի Կենտրոն վարչական շրջանում գտնվող բնակարանի 2/16 բաժնեմասը։ Բաժնեմասը ձեռք էր բերվել դեռևս 1995 թվականի օգոստոսի 10-ին։ Պաշտոնը ստանձնելու պահին նա տրանսպորտային միջոց չի հայտարարագրել։

Չեն հայտարարագրվել նաև արժեթղթեր, այլ ներդրումներ, հանձնված փոխառություններ կամ 4 մլն դրամը գերազանցող արժեք ունեցող թանկարժեք գույք։ Միաժամանակ, Աննա Կարապետյանն ունեցել է 2 մլն դրամի բանկային ավանդ։ Բանկային հաշիվներում առկա միջոցները կազմել են 461 հազար 383 դրամ, 4088 եվրո և 0.96 ԱՄՆ դոլար։ Կանխիկ դրամական միջոցները կազմել են 3 մլն դրամ։ Պաշտոնը ստանձնելու վերաբերյալ հայտարարագրում նշված հաշվետու ժամանակահատվածում Կարապետյանի ընդհանուր եկամուտը կազմել է 11 մլն 206 հազար 47.65 դրամ։ Դրանից 5 մլն 169 հազար 479 դրամը ստացվել է ՄԱԿ-ի Զարգացման ծրագրից, 3 մլն 95 հազար 757 դրամը՝ «Օրենսդրության զարգացման կենտրոն» հիմնադրամից, իսկ 247 հազար 72 դրամը՝ Արդարադատության նախարարությունից։ Բացի այդ, նա ստացել է 3000 եվրո՝ Ծրագրերի կառավարման կենտրոնական գործակալությունից/Լիտվայի Հանրապետությունից, 2400 եվրո՝ ԵԱՀԿ-ից, 837 եվրո՝ Եվրոպայի խորհրդից և 140 հազար դրամ՝ «Մարդը կարիքի մեջ» ԲՀԿ հայաստանյան ներկայացուցչությունից։ 2024 թվական։

Արդարադատության նախարարի տեղակալի պաշտոնը ստանձնելուց առաջ՝ 2024 թվականի սկզբին, Կարապետյանի անունով եղել է նույն բնակարանի 2/16 բաժնեմասը, ինչպես նաև 1999 թվականի արտադրության Mitsubishi մակնիշի մարդատար ավտոմեքենա։ Սակայն 2024 թվականի դեկտեմբերի 3-ին Mitsubishi-ն օտարվել է նվիրատվության եղանակով։ 2024 թվականի վերջում Կարապետյանի բանկային հաշիվներում եղել է 403 հազար 609 դրամ, 4083 եվրո և 489 ԱՄՆ դոլար, իսկ բանկային ավանդը կազմել է 2 մլն դրամ։ Կանխիկ գումարը տարվա սկզբի 2 մլն դրամից հասել է 3 մլն դրամի։ 2024 թվականի ընթացքում Աննա Կարապետյանի հայտարարագրած ընդհանուր եկամուտը կազմել է 11 մլն 359 հազար 852.07 դրամ։ 2025 թվական։ 2025 թվականին արդեն տեղի է ունեցել նրա ունեցվածքի էական փոփոխություն։ Սեպտեմբերի 19-ին Աննա Կարապետյանը ձեռք է բերել բնակարան՝ 37 մլն 960 հազար դրամով։ 2025 թվականի վերջում նրա անունով առկա է եղել ինչպես նոր ձեռք բերած բնակարանը, այնպես էլ 1995 թվականին ձեռք բերված բնակարանի 2/16 բաժնեմասը։ 2025 թվականի ընթացքում նրա բանկային ավանդը՝ տարվա սկզբի 2 մլն դրամից, տարվա վերջին դարձել է զրո։ Բանկային հաշիվներում տարվա վերջում առկա է եղել 1 մլն 476 հազար 397 դրամ, 1494 եվրո, ինչպես նաև մեկ այլ հաշվին՝ 85 հազար 897 դրամ։ ԱՄՆ դոլարային հաշվի մնացորդը զրո է եղել։

Կանխիկ գումարը ևս ավելացել է․ տարվա սկզբի 3 մլն դրամից տարեվերջին այն հասել է 5 մլն 300 հազար դրամի։ Ամենաէական փոփոխությունը, սակայն, եղել է եկամուտների մասով։ 2025 թվականին Աննա Կարապետյանը հայտարարագրել է ընդհանուր 52 մլն 381 հազար 428 դրամ եկամուտ։ Դրանից 18 մլն 645 հազար 28 դրամը Արդարադատության նախարարությունից ստացած աշխատանքի վարձատրությունն է։ Բացի այդ, նա 32 մլն 900 հազար դրամ է հայտարարագրել Ամերիաբանկից ստացված փոխառությունների, ևս 670 հազար դրամ՝ Էվոկաբանկից ստացված փոխառության տեսքով։ Բանկային ավանդների կամ այլ միջոցների դիմաց ստացված տոկոսային եկամուտը կազմել է 166 հազար 400 դրամ։ Բնակարանի ձեռքբերման արդյունքում 2025 թվականի վերջում Կարապետյանն ունեցել է նաև վարկային պարտավորություն։

Դեկտեմբերի 31-ի դրությամբ վարկի մայր գումարի մնացորդը կազմել է 29 մլն 495 հազար 398 դրամ, իսկ տարվա ընթացքում վարկի մարմանն ուղղված վճարումները՝ 4 մլն 74 հազար 602 դրամ։ Նոր բնակարանի համար կատարվել են նաև 4 մլն 260 հազար դրամի վերանորոգման ծախսեր։ Այսպիսով, Աննա Կարապետյանի՝ նախարարի տեղակալի պաշտոնը ստանձնելուց հետո հայտարարագրերում արձանագրվել է ունեցվածքի և ֆինանսական պարտավորությունների փոփոխություն․ 2024 թվականին նա ունեցել է բնակարանի 2/16 բաժնեմաս, Mitsubishi ավտոմեքենա, 2 մլն դրամ ավանդ և 3 մլն դրամ կանխիկ, իսկ 2025 թվականի վերջին արդեն հայտարարագրել է 37.96 մլն դրամով ձեռք բերված բնակարան, 29.5 մլն դրամ վարկային պարտավորություն և 5.3 մլն դրամ կանխիկ գումար։ Միաժամանակ, 2025 թվականի տարեկան հայտարարագրված եկամուտը կազմել է ավելի քան 52.3 մլն դրամ»։