ՀՀ ՆԳ նախարար Արփինե Սարգսյանի՝ Փրկարարի օրվա առթիվ ուղերձը

ՀՀ ներքին գործերի նախարար Արփինե Սարգսյանը շնորհավորական ուղերձ է հղել Փրկարարի օրվա առթիվ՝ ընդգծելով փրկարարների ամենօրյա պատասխանատու և անձնվեր ծառայության կարևորությունը։

Նախարարը նշել է, որ փրկարար լինելը պարզապես մասնագիտություն չէ, այլ կոչում, որը պահանջում է բարձր արհեստավարժություն, խիզախություն, անձնվիրություն և անհրաժեշտության դեպքում սեփական կյանքը վտանգելու պատրաստակամություն։

«Շնորհակալ եմ ձեր խիզախության, դժվարին ու պատասխանատու ծառայության, յուրաքանչյուր փրկված կյանքի համար»,– նշել է Արփինե Սարգսյանը։

ՆԳ նախարարն ընդգծել է, որ պետության կարևորագույն պարտականություններից է ստեղծել այնպիսի պայմաններ, որպեսզի փրկարարներն իրենց բարդ աշխատանքը կատարեն ժամանակակից տեխնիկայով, անհրաժեշտ միջոցներով, արժանի վարձատրությամբ և սոցիալական երաշխիքներով։

Նրա խոսքով՝ Փրկարար ծառայության բարեփոխումները շարունակվում են։ Զարգացվում են ծառայության տեխնիկական և մասնագիտական կարողությունները, համալրվում է նյութատեխնիկական բազան, ներդրվում են նոր տեխնիկական միջոցներ և հատուկ նշանակության մեքենաներ։

Շարունակվում է նաև փրկարարների ատեստավորման գործընթացը, որի արդյունքում ծառայողներին հնարավորություն է տրվում ստանալ բարձրացված վարձատրություն՝ իրենց մասնագիտական պատրաստվածության և կատարած աշխատանքի գնահատմանը համապատասխան։

Արփինե Սարգսյանը շնորհակալություն է հայտնել բոլոր փրկարարներին՝ իրենց նվիրվածության և ծառայության համար, ինչպես նաև նրանց ընտանիքներին՝ ամենօրյա աջակցության և համբերության համար։

Նախարարը մաղթել է փրկարարներին անվտանգ ծառայություն և նշել, որ յուրաքանչյուր փրկված կյանք նրանց աշխատանքի ամենակարևոր արդյունքն է։