Փոթորիկը ավերել է մարզադաշտը AC/DC-ի համերգից առաջ

Կանադայի Տորոնտո քաղաքում հզոր փոթորիկը զգալի վնաս է հասցրել Rogers Centre մարզադաշտին, որտեղ սեպտեմբերի 16-ին նախատեսված է AC/DC խմբի համերգը, հայտնում է «360» Telegram-ալիքը։

Քամու արագությունը գերազանցել է 110 կմ/ժ-ը, իսկ կարկուտի հատիկները հասել են գոլֆի գնդակի չափերի։ Հորդառատ տեղումների հետևանքով քաղաքի մի շարք ճանապարհներ ջրի տակ են անցել։

Առավել մեծ վնաս է կրել շուրջ 50 հազար հանդիսատես տեղավորող Rogers Centre-ը։ Ուժեղ քամին պոկել է տանիքի մի մասը, վնասել տրիբունաները, իսկ պլաստիկ նստատեղերից շատերը կոտրվել են։ Մարզադաշտի տարածքում բազմաթիվ բեկորներ են ցրվել։

Տարերային աղետի հետևանքով շուրջ 65 հազար բնակիչ մնացել է առանց էլեկտրականության։ Տորոնտոյում հեղեղվել և փակվել են ճանապարհներ, տապալվել ծառեր ու էլեկտրահաղորդման գծեր։ Տուժածների մասին չի հաղորդվում։ AC/DC-ի՝ սեպտեմբերի 16-ին նախատեսված համերգի անցկացումն այժմ հարցականի տակ է։