Գիտնականներն Արեգակի ակտիվության կտրուկ աճ են արձանագրել

Արեգակի ակտիվությունը սկսել է կտրուկ աճել։ Այս մասին հայտնել են Ռուսաստանի գիտությունների ակադեմիայի Տիեզերական հետազոտությունների ինստիտուտի Արեգակնային աստղագիտության լաբորատորիայի մասնագետները։

Տիեզերական աստղադիտակներից ստացված պատկերներում Արեգակի ձախ՝ արևելյան եզրին նկատվել են պլազմայի բազմաթիվ արտանետումներ։ Գիտնականների տվյալներով՝ դրանց աղբյուրները ներկայում գտնվում են Արեգակի հակառակ կողմում և դեռ տեսանելի չեն Երկրից։

Մասնագետները նշում են, որ այս պահին արտանետվող արեգակնային նյութը չի կարող հասնել Երկիր։ Մեր մոլորակի համար հնարավոր ռիսկեր առաջանալու համար բարձր ակտիվությունը պետք է պահպանվի ևս 4-5 օր, որպեսզի ակտիվ շրջանները հայտնվեն Արեգակի տեսանելի կողմում և մոտենան Արեգակ-Երկիր ուղղությանը։

Առաջիկա երկու օրերին գիտնականները կկարողանան ավելի հստակ գնահատել իրավիճակը, երբ ակտիվ բծերի խմբերը սկսեն տեսանելի դառնալ։ Այդ ժամանակ հնարավոր կլինի հասկանալ դրանց չափերն ու կուտակված էներգիայի պաշարը։