Թուրքիան բողոք է հայտնել Հունաստանին՝ Էվրոսի շրջանում սահմանային ցանկապատի կառուցման պատճառով

Թուրքիան Հունաստանին պաշտոնական դիվանագիտական նոտա է հղել Էվրոս գետի երկայնքով սահմանային ցանկապատի կառուցման կապակցությամբ՝ պնդելով, որ դրա որոշ հատվածներ կառուցվում են թուրքական տարածքում։ Այս մասին հայտնում է հունական Kathimerini-ն։

Խոսքը Էվրոսի շրջանի կենտրոնական հատվածի մասին է, որտեղ 35 կմ երկարությամբ ցանկապատի կառուցումը մեկնարկել է 2023 թվականին և ավարտվել 2025-ի սկզբին։ Մոտ յոթ հատվածներում, որոնց ընդհանուր երկարությունը շուրջ 5 կմ է, աշխատանքները դադարեցվել էին սահմանային պատկանելիության շուրջ տարաձայնությունների պատճառով։

Հունական ռազմական քարտեզներով վիճելի տարածքները համարվում են Հունաստանի տարածք, մինչդեռ Թուրքիան դրանք իրենն է համարում։ Տարաձայնությունների պատճառներից մեկը Էվրոս գետի հունի փոփոխությունն է, քանի որ գետը երկու երկրների միջև սահմանի զգալի հատվածում բնական սահման է հանդիսանում։

Վեճը սրվել է նաև 2024 թվականին, երբ Հունաստանը սկսել է սահմանային տվյալները թվային ձևաչափի փոխակերպել։ Դիվանագիտական աղբյուրների համաձայն՝ հին՝ 1926 թվականի չափումների հիման վրա կազմված քարտեզների և նոր թվային տվյալների միջև հայտնաբերվել են որոշ անհամապատասխանություններ։

Հունաստանի իշխանությունները մոտ հինգ ամիս առաջ որոշել են ավարտել ցանկապատի կառուցումը վիճելի հատվածներում՝ հիմք ընդունելով հունական քարտեզները։ Տեղափոխվող արգելապատնեշի փոխարեն նախատեսվել է մշտական կառույցի տեղադրում։

Այս որոշումն էլ դարձել է Անկարայի պաշտոնական բողոքի պատճառը։ Դիվանագիտական նոտան փոխանցվել է Կապիտան-Անդրեևո սահմանային անցակետում գործող՝ Հունաստանի, Թուրքիայի և Բուլղարիայի կապի կետի միջոցով։