Մեծ Բրիտանիայի Դուվր նավահանգստի աշխատանքը խափանվել է միգրացիայի դեմ բողոքի պատճառով

Մեծ Բրիտանիայի հարավ-արևելքում գտնվող Դուվր նավահանգստի աշխատանքը խափանած ակցիան ուղղված է եղել անօրինական միգրացիայի դեմ։ Այս մասին ՏԱՍՍ-ին հայտնել է Քենթի խորհրդի անդամ, Reform UK կուսակցության ներկայացուցիչ Փոլ Քինգը։

Նրա խոսքով՝ ցուցարարները բողոքում են փոքր նավակներով Մեծ Բրիտանիա ժամանող անօրինական միգրանտների դեմ։ Միևնույն ժամանակ Քինգը շեշտել է, որ չի արդարացնում բողոքի ընթացքում հասարակական կարգի խախտումները։

Բրիտանական խորհրդարանի պատգամավոր, Լեյբորիստական կուսակցության ներկայացուցիչ Մայք Թափը խիստ քննադատել է ցուցարարներին՝ նշելով, որ փոքր նավակներով Դուվր ժամանող միգրանտների թիվն արդեն նվազել է 40%-ով։

Ավելի վաղ Դուվրի նավահանգստի վարչակազմը հայտնել էր, որ ճանապարհների արգելափակման պատճառով մեքենաները չեն կարողացել մուտք գործել կամ դուրս գալ նավահանգստից։ Ավելի ուշ մուտքը մասամբ վերականգնվել է, սակայն լաստանավերի երթևեկությունը շարունակվել է ուշացումներով։