Ժաննա Անդրեասյան․ Ընթերցանությունը կենսակերպ պետք է դառնա

Երևանում պաշտոնապես մեկնարկել է Գրքի երևանյան միջազգային 9-րդ փառատոնը, որի բացմանը ներկա են եղել ԿԳՄՍ նախարար Ժաննա Անդրեասյանը, Երևանի քաղաքապետ Տիգրան Ավինյանը, գրողներ, հրատարակիչներ և ընթերցասերներ։

Փառատոնի այս տարվա թեման լեզուն է՝ որպես քաղաքակրթության հիշողությունը պահպանող և փոխանցող երևույթ։

Ժաննա Անդրեասյանը նշել է, որ փառատոնը ԿԳՄՍ նախարարության կողմից հայտարարված Ընթերցանության տարվա մեկնարկային միջոցառումներից է։ Նրա խոսքով՝ ընթերցանությունը պետք է դուրս գա միայն կրթական համակարգի շրջանակներից և դառնա կենսակերպ։

«Ընթերցանությունն այն հիմնական մեթոդն է, որի միջոցով կարողանում ենք անձնային զարգացում ապրել»,– ասել է նախարարը։

Նա նաև նշել է, որ Հայաստանը մասնակցում է PISA միջազգային ծրագրին, որի միջոցով գնահատվում է 15 տարեկանների ընթերցանության մակարդակը։ Արդյունքները, ըստ նախարարի, կօգնեն հասկանալ այս ուղղությամբ հետագա անելիքները։

Փառատոնը կշարունակվի մինչև սեպտեմբերի 6-ը Հանրապետության հրապարակում։ Ծրագրում ներառված է 54 միջոցառում, մասնակցում են 13 երկրների գրողներ և հրատարակիչներ։ Գրքի ցուցահանդես-տոնավաճառին մասնակցում է շուրջ 60 կազմակերպություն, իսկ գրքերը վաճառվելու են 20-40 տոկոս զեղչով։