Իտալիայի ծայրահեղ աջ քաղաքական գործիչը օգտագործել է Պավարոտիի ձայնը․ երգչի ընտանիքը վրդովված է

Իտալացի օպերային երգիչ Լուչանո Պավարոտիի ընտանիքը դատապարտել է նրա ձայնի օգտագործումը «Ազգի ապագա» ծայրահեղ աջ կուսակցության առաջնորդ Ռոբերտո Վանաչիի քաղաքական հոլովակում, հայտնում է Ansa-ն.

2007 թվականին մահացած արտիստի հարազատները հայտարարել են, որ երբևէ թույլ չեն տվել այս համատեքստում օգտագործել նրա ձայնը, անունը կամ կերպարը։

Վանաչին, որը նախկին գեներալ է և Եվրոպական խորհրդարանի պատգամավոր, սոցցանցերում հրապարակել է արհեստական բանականության օգնությամբ ստեղծված հոլովակ։ Տեսանյութում նա հայտնվում է ատրճանակներ դեպի իրեն ուղղած մարդկանց շրջապատում. Ֆոնին հնչում է Պավարոտիի ձայնը, որը կատարում է Ջակոմո Պուչինիի «Տուրանդոտ» օպերայից հանրահայտ «Nessun dorma» արիան, մասնավորապես դրա հայտնի եզրափակիչ արտահայտությունը՝ «Արշալույսին ես կհաղթեմ»։

Հոլովակի վերջում Վանաչին արտասանում է իր քաղաքական կարգախոսը՝ «Ինձ համար միևնույն է», և դիմում քննադատներին՝ ասելով «Կտեսնվենք արշալույսին»։ Հրապարակման մեջ նա թվարկում է իր հասցեին հնչող մեղադրանքները՝ քսենոֆոբիայի, հոմոֆոբիայի, սեքսիզմի և Մոսկվայի հետ կապերի վերաբերյալ, ներառյալ «Մոսկվայի տրոյական ձի» բնորոշումը։ Հոլովակը դարձել է Վանաչիի հասցեին հնչած քննադատության պատասխանը, այդ թվում՝ Financial Times-ի հրապարակումից հետո, որտեղ նրան Իտալիայում Մոսկվայի «տրոյական ձի» էին անվանել։

«Մենք երբեք թույլտվություն չենք տվել Լուչանո Պավարոտիի ձայնի, անվան կամ անձի օգտագործման համար», — ասվում է նրա ընտանիքի հայտարարության մեջ։ Երգչի հարազատները նաև ընդգծել են, որ «վճռականորեն հեռավորություն են պահպանում» քաղաքական ուղերձների, դիրքորոշումների կամ նախաձեռնությունների հետ նրա անվան ցանկացած կապից։

Վանաչին աջ ընտրողների շրջանում ժողովրդականություն է վայելում միգրացիայի և անվտանգության հարցերում իր կոշտ դիրքորոշման շնորհիվ։ Այս տարի նա հիմնադրել է «Ազգի ապագա» կուսակցությունը, որը, վերջին հարցումների համաձայն, արդեն առաջ է անցել Ջորջա Մելոնիի իշխող կոալիցիայի կրտսեր գործընկերներից՝ «Լիգայից» և «Առաջ, Իտալիա»-ից։