Զելենսկին պատրաստ է երեք օր չհարվածել Մոսկվային՝ մեկ պայմանով

Ուկրաինայի նախագահ Վոլոդիմիր Զելենսկին հայտարարել է, որ Ուկրաինան պատրաստ է առաջիկա երեք օրերին ձեռնպահ մնալ Մոսկվային օդային հարվածներ հասցնելուց։ Նա ակնկալում է, որ Ռուսաստանն իր հերթին նույն ժամանակահատվածում հարվածներ չի հասցնի Կիևին։

Զելենսկու խոսքով՝ ինքը զրուցել է ԱՄՆ նախագահ Դոնալդ Թրամփի ներկայացուցիչների հետ, որոնք արդեն Մոսկվայում սկսել են աշխատանքը ռուսական կողմի հետ։

«Հենց նոր խոսեցինք ԱՄՆ նախագահի ներկայացուցիչների հետ։ Նրանք այսօր արդեն սկսել են աշխատանքը ռուսական կողմի հետ։ Մեր այս խոսակցության պահից մենք պատրաստ ենք պահպանել բանակցային գործընթացում ներգրավված քաղաքներին օդային հարվածներ չհասցնելու ռեժիմը»,- գրել է Զելենսկին։

Նա հստակեցրել է, որ Ուկրաինան պատրաստ է մինչև շաբաթ օրվա ավարտը, ինչպես նաև կիրակի և երկուշաբթի օրերին չհարվածել Մոսկվային։

«Այս պահից մինչև այս շաբաթ օրվա ավարտը, կիրակի և երկուշաբթի Ուկրաինան պատրաստ է ձեռնպահ մնալ Մոսկվային հարվածներ հասցնելուց և ակնկալում ենք, որ ռուսները՝ Կիևին»,- հայտարարել է Ուկրաինայի նախագահը։

Զելենսկու հայտարարությունը հնչել է ԱՄՆ նախագահ Դոնալդ Թրամփի ներկայացուցիչներ Սթիվ Ուիթքոֆի և Ջարեդ Քուշների Մոսկվա այցի ֆոնին։ Նրանք սեպտեմբերի 5-ին ժամանել են Ռուսաստանի մայրաքաղաք՝ Ուկրաինայում պատերազմի դադարեցման շուրջ բանակցությունների համար։ ԱՄՆ նախագահը նախապես հայտնել էր, որ իր ներկայացուցիչները Մոսկվա են տանում պատերազմը դադարեցնելու վերաբերյալ առաջարկ։

ՌԴ նախագահի մամուլի քարտուղար Դմիտրի Պեսկովն իր հերթին հայտարարել է, որ Վլադիմիր Պուտինը կարգադրել է սեպտեմբերի 5-ի կեսգիշերից երեք օր հարվածներ չհասցնել Կիևին։ Պեսկովի խոսքով՝ որոշումը կապված է Ուիթքոֆի և Քուշների՝ Կիև նախատեսվող այցի հետ։

Զելենսկին նաև հայտնել է, որ Կիևում արդեն հաստատվել է ամերիկյան պատվիրակության մասնակցությամբ նախատեսված բանակցությունների ծրագիրը։

«Դիվանագիտական ուղղությամբ մեր գործողությունները պետք է լինեն և կլինեն նույնքան՝ հարյուր տոկոսով ուժեղ և արդյունավետ։ Կիևում վաղվա դիվանագիտական միջոցառումների ծրագիրը՝ ամերիկյան թիմի մասնակցությամբ, հաստատված է։ Սպասում ենք Սթիվ Ուիթքոֆին և Ջարեդ Քուշներին և պատրաստ ենք բովանդակային զրույցի»,- գրել է Զելենսկին։

Ուիթքոֆն ու Քուշները Մոսկվայում բանակցություններից հետո նախատեսում են մեկնել Կիև և հանդիպել Ուկրաինայի ղեկավարության հետ։ Նրանց այցը տեղի է ունենում Վաշինգտոնի՝ ռուս-ուկրաինական պատերազմի դադարեցման շուրջ բանակցությունները վերսկսելու փորձերի շրջանակում։