Սան Ֆրանցիսկոյում տղամարդուն պատահմամբ աղբի հետ աղբատար մեքենայի մեջ են բեռնել․ փրկարարները շուրջ երկու ժամ որոնել են նրան

Սան Ֆրանցիսկոյում տղամարդուն պատահմամբ աղբատար մեքենայի մեջ են բեռնել աղբի հետ միասին։ Դեպքը տեղի է ունեցել սեպտեմբերի 2-ի վաղ առավոտյան՝ Թենդերլոյն շրջանում։ Անցորդները մեքենայի թափքից լսել են գոռոցներ և կանգնեցրել վարորդին։

Տեղական ժամանակով մոտ 04:10-ին այդտեղ են ժամանել ավելի քան 25 հրշեջներ։ KTVU FOX2-ի հաղորդմամբ, տղամարդն ամբողջովին թաղված է եղել աղբատարի ներսում գտնվող հսկայական աղբակույտի տակ։

Նախնական տվյալներով, տղամարդը գտնվել է աղբամանում, երբ Recology ընկերության վարորդը մոտեցել է այն դատարկելու և պարունակությունը լցրել մեքենայի մեջ։ Դրանից հետո վարորդը հասցրել է մեկ անգամ գործարկել սեղմիչը, նախքան հասկացել է, որ ներսում մարդ կա։ Առայժմ հայտնի չէ, թե տղամարդն ինչ վնասվածքներ է ստացել՝ ընկնելու պահին, սեղմիչի աշխատանքի հետևանքով, թե այն բանի պատճառով, որ հայտնվել է աղբի տակ թաղված։

Փրկարարները ավելի քան երկու ժամ ձեռքով քանդել են աղբը։ Նրանց հաջողվել է հասնել տուժածի ձեռքին և տեղադրել ներերակային համակարգ՝ դեղեր ներարկելու համար։ Մոտ 07:00-ին տղամարդուն վերջապես դուրս են բերել աղբատար մեքենայից և տեղափոխել հիվանդանոց։

Փրկության պահին նա գիտակցության մեջ է եղել։ Սան Ֆրանցիսկոյի հրշեջ ծառայության կապիտան Մարիանո Էլիասը պատմել է, որ տղամարդը «ամբողջ ընթացքում խոսում էր» փրկարարների հետ։ Նրա վնասվածքների ճշգրիտ բնույթի մասին դեռ չի հաղորդվում։

Ոստիկանությունը նախատեսում է հիվանդանոցում զրուցել տղամարդու հետ՝ պարզելու, թե նա ինչպես և ինչու է հայտնվել աղբամանի ներսում։

Տուժածին փրկելուց հետո Recology-ի աշխատակիցները շինտեխնիկայի օգնությամբ փողոցում մնացած աղբակույտը հեռացրել են և թափոնները բեռնել նոր տարայի մեջ՝ այս անգամ, ինչպես նշում են ամերիկյան լրատվամիջոցները, առանց ուղևորների։