Սեպտեմբերի 6-ից ԵՄ սահմաններին փոխվում են մուտքի կանոնները

Սեպտեմբերի 6-ից Եվրամիության երկրներում ավարտվում են Մուտքի/ելքի համակարգի (EES) աշխատանքի ժամանակավոր մեղմացումները։ Ուղևորներին զգուշացնում են, որ ԵՄ արտաքին սահմաններին անձնագրային ստուգումները կարող են ավելի երկար տևել։ Այս մասին հայտնում է Euronews-ը։

Ամռան ընթացքում ԵՄ որոշ երկրներ հնարավորություն ունեին ժամանակավորապես դադարեցնել կենսաչափական տվյալների՝ մատնահետքերի և դեմքի պատկերի հավաքագրումը, եթե EES համակարգի աշխատանքի պատճառով սահմանային անցակետերում մեծ հերթեր էին առաջանում։

Սեպտեմբերի 6-ից այդ ժամանակավոր մեխանիզմն այլևս չի գործի։ Դա նշանակում է, որ օդանավակայաններն ու սահմանային ծառայություններն ավելի քիչ հնարավորություն կունենան պարզեցնելու կենսաչափական ստուգումները նույնիսկ մեծ ծանրաբեռնվածության դեպքում։

EES համակարգն ամբողջությամբ գործարկվել է 2026 թվականի ապրիլի 10-ին՝ 2025 թվականի հոկտեմբերին սկսված փուլային ներդրումից հետո։ Համակարգն ավտոմատ գրանցում է ԵՄ անդամ չհանդիսացող երկրների քաղաքացիների մուտքն ու ելքը՝ կարճաժամկետ այցերի ժամանակ։

Եվրահանձնաժողովի տվյալներով՝ ամռանը համակարգն ընդհանուր առմամբ նորմալ է աշխատել, սակայն որոշ երկրների հետ դեռ քննարկվում են այն անցակետերի խնդիրները, որտեղ լրացուցիչ տեխնիկական կարգավորումներ են անհրաժեշտ։

Միջազգային օդային տրանսպորտի ասոցիացիայի (IATA) տվյալներով՝ եթե նախկինում սովորական անձնագրային ստուգումը տևում էր մոտ 20-25 վայրկյան, ապա EES-ի կիրառմամբ այն կարող է տևել մոտ 90 վայրկյան։

Եվրոպական մի շարք օդանավակայաններում արդեն արձանագրվել է սպասման ժամանակի զգալի աճ։ Օրինակ՝ Ֆրանկֆուրտում հուլիսին միջին սպասման ժամանակը հասել է մոտ 120 րոպեի՝ նախորդ տարվա 60 րոպեի փոխարեն։ Մյունխենում առավելագույն սպասումը մոտ 31 րոպեից հասել է 60-ի, իսկ Ամստերդամում՝ 80 րոպեից 120-ի։

Ուղևորներին խորհուրդ է տրվում սեպտեմբերի 6-ից Եվրոպա մեկնելիս լրացուցիչ ժամանակ նախատեսել սահմանային ստուգումների համար և հնարավորության դեպքում խուսափել եվրոպական օդանավակայաններում շատ կարճ տևողությամբ տարանցիկ կանգառներից։