Կողոպուտ, սպանություն և ինքնության գողություն․ Ավստրալիայում փախուստից 30 տարի անց երկրի ամենաաղմկահարույց հանցագործներից մեկը կկանգնի դատարանի առաջ

76-ամյա Ալեքսանդր Ռոբերտ Մաքդոնալդը՝ Ավստրալիայի ամենահայտնի դաժան հանցագործներից մեկը, կրկին կկանգնի դատարանի առաջ՝ գրեթե 30 տարի անց այն բանից հետո, երբ նա Նոր Հարավային Ուելսում կատարել էր երկու զինված բանկային կողոպուտ, հաղորդում է Australian Associated Press-ը։

Մաքդոնալդն իրեն մեղավոր է ճանաչել 1996 և 1997 թվականներին կատարված կողոպուտների համար, և երկուշաբթի օրը նրան պետք է դատավճիռ կայացնեն։ Ավելի վաղ նա արդեն երկարատև պատիժներ էր կրել զինված կողոպուտների և սպանության համար, իսկ 1995 թվականին փախել էր Քվինսլենդի բանտից։

Առաջին կողոպուտը տեղի է ունեցել 1996 թվականի հոկտեմբերին՝ Կունաբարաբրանում գտնվող Commonwealth Bank-ի մասնաճյուղում։ Մաքդոնալդը այնտեղ ներխուժել է բալակլավայով և կարճափող հրացանով ու տարել մոտ 19 հազար ավստրալական դոլար։ Դուրս գալիս նա բռնել է 22-ամյա մի կնոջ և նրան օգտագործել որպես կենդանի վահան, որպեսզի անարգել հասնի մոտոցիկլին։ Այն բանից հետո, երբ նա հեռացել է, պատանդին անվնաս ազատ են արձակել։

Մոտ երկու ամիս անց Մաքդոնալդը կողոպտել է Լորիտոնում գտնվող ANZ-ի մասնաճյուղը։ Այս անգամ ավարը կազմել է մոտ 78 հազար դոլար։ Հանցագործը կրկին պատանդ է վերցրել՝ բանկի աշխատակցուհուն, և նրան օգտագործել որպես վահան դուրս գալու պահին։ Դրանից հետո նա փախել է բաց կանաչ Subaru-ով։

Այս հանցագործությունները Մաքդոնալդի քրեական կենսագրության միայն մի մասն էին։ 1995 թվականին բանտից փախչելուց հետո նա տեղափոխվել է Մելբուռն, որտեղ հայտարարություն է տեղադրել՝ իբր Արևմտյան Ավստրալիայի հանքարդյունաբերության ոլորտում աշխատանքի համար աշխատող փնտրելու մասին։

Արձագանքածներից մեկը 47-ամյա Ռոնալդ Ջոզեֆ Ուիլյամսն էր։ Մաքդոնալդը նրա հետ մեկնել է արևմուտք, սակայն Ուիլյամսը չի հասել նշանակման վայրը։ Ավելի ուշ Մաքդոնալդը խոստովանել է, որ գլխին երկու կրակոցով սպանել է նրան, վերցրել փաստաթղթերն ու ինքնությունը հաստատող այլ նշանները, ապա թաղել նրան Չեյնիս Բիչ լողափի մոտ՝ Օլբանիից ոչ հեռու։

Սպանությունից հետո Մաքդոնալդը յուրացրել է իր զոհի ինքնությունը, տեղափոխվել Կարնարվոն, ապա վերադարձել Վիկտորիա։ Այնտեղ նա 20 հազար դոլար կանխիկով գնել է զբոսանավ և ևս մոտ 40 հազար ծախսել դրա վերազինման վրա՝ ծրագրելով լքել Ավստրալիան։

1997 թվականին Մաքդոնալդը իրեն մեղավոր է ճանաչել Ուիլյամսի սպանության և Բասելթոնում ևս մեկ զինված կողոպուտի համար։ Արևմտյան Ավստրալիայում նա անցկացրել է 25 տարի ազատազրկման մեջ, որից հետո պետք է վերադառնար Քվինսլենդ՝ կրելու այն պատժի մնացած մասը, որը նշանակվել էր իր փախուստից առաջ կատարած հանցագործությունների համար։

2026 թվականի մարտին, Քվինսլենդում պատժաժամկետի ավարտից հետո, Մաքդոնալդին ձերբակալել և արտահանձնել են Նոր Հարավային Ուելս՝ հին գործերով դատաքննության համար։ Օգոստոսի 6-ին նա իրեն մեղավոր է ճանաչել զինված կողոպուտի երկու դրվագով և մարդկանց ապօրինի պահելու վերաբերյալ երկու մեղադրանքով։ Այժմ նա պետք է իմանա իր նոր պատժաժամկետը՝ այս հանցագործությունները կատարելուց գրեթե երեք տասնամյակ անց։