Սեպտեմբերի 7-ին և 8-ին Արեգակի վրա ուժեղ բռնկումներ են սպասվում

Սեպտեմբերի 7-ին և 8-ին Արեգակի վրա կանխատեսվում են M դասի ուժեղ բռնկումներ։ Այս մասին հայտնել է Ռուսաստանի Կիրառական երկրաֆիզիկայի ինստիտուտը։

Մասնագետների կանխատեսմամբ՝ ընդհանուր առմամբ Արեգակի բռնկումային ակտիվությունը կմնա ցածր, սակայն հնարավոր են M դասի առանձին բռնկումներ։ Սեպտեմբերի 7-ին Երկրի գեոմագնիսական դաշտը, հավանաբար, կլինի անկայուն, իսկ սեպտեմբերի 8-ին՝ թույլ խանգարված։

Նման բռնկումները կարող են ուղեկցվել պլազմայի արտանետումներով։ Եթե դրանք ուղղված լինեն դեպի Երկիր, կարող են առաջացնել գեոմագնիսական խանգարումներ և մագնիսական փոթորիկներ։ Սակայն մասնագետներն առայժմ չեն նշել, թե սպասվող բռնկումները կոնկրետ ինչ ազդեցություն կարող են ունենալ Երկրի վրա։

Երկու օր առաջ Արեգակի վրա արդեն գրանցվել էր M1.0 դասի ուժեղ բռնկում։