«Այլընտրանք Գերմանիայի համար»-ի հաջողությունը հարված է դարձել Մերցի համար և նախազգուշացում՝ Եվրոպային

Գերմանիայի Սաքսոնիա-Անհալթ երկրամասում կայացած ընտրություններում աջ պոպուլիստական «Այլընտրանք Գերմանիայի համար» (AfD) կուսակցության հաջողությունը լուրջ քաղաքական հարված է դարձել կանցլեր Ֆրիդրիխ Մերցի համար և մտահոգիչ ազդակ՝ եվրոպական մյուս երկրների ղեկավարներին, գրում է Reuters-ը։

AfD-ն կիրակի կայացած ընտրությունների արդյունքում ընդամենը մի փոքր է զիջել երկրամասի խորհրդարանում բացարձակ մեծամասնություն ստանալու համար անհրաժեշտ ցուցանիշին։ Infratest dimap-ի հարցման համաձայն՝ Սաքսոնիա-Անհալթի ընտրողների 87%-ը դժգոհ է Մերցի կառավարության աշխատանքից։ Ընտրողների դժգոհության հիմնական պատճառների թվում են կյանքի թանկացումը, կենսաթոշակների հարցը և տնտեսական անորոշությունը։

Մերցը կուսակցության ղեկավարությանը հայտարարել է, որ ընտրությունների արդյունքը Քրիստոնեա-դեմոկրատական միությանը (CDU) «ցնցել է մինչև հիմքերը», սակայն կրկին բացառել է AfD-ի հետ համագործակցությունը։ Կուսակցությունն իր հերթին Սաքսոնիա-Անհալթում գրանցած արդյունքը դիտարկում է որպես 2029 թվականի համապետական ընտրություններում հաղթելու ճանապարհին առաջին քայլ։

Reuters-ը նշում է, որ ընտրությունների արդյունքը կարող է նախազգուշացում լինել նաև Եվրոպայի մյուս երկրների համար, որտեղ աճում է դժգոհությունը ավանդական քաղաքական ուժերից։ Ֆրանսիայի ֆինանսների նախարար Ռոլան Լեսկյուրը տեղի ունեցածն անվանել է «շատ, շատ մտահոգիչ ազդակ»՝ խոսելով աշխարհում ուժեղացող պոպուլիստական ալիքի մասին։

AfD-ի դիրքերի ամրապնդման ֆոնին Գերմանիան շարունակում է բախվել տնտեսական լուրջ խնդիրների՝ բարձր էներգակիրների գներից մինչև արդյունաբերության դժվարություններ և աշխատատեղերի հնարավոր կրճատումներ։ Reuters-ի գնահատմամբ՝ այս պայմաններում Մերցի կառավարության համար ընտրողների վստահությունը վերականգնելը դառնում է ավելի բարդ խնդիր։