Պուտինի նոր հրամանը՝ արտերկրում թաքնված ՌԴ քաղաքացիների համար

Ռուսաստանի Դաշնության նախագահ Վլադիմիր Պուտինը հրամանագիր է ստորագրել հատուկ միջգերատեսչական հանձնաժողով կազմավորելու մասին։ Կառույցի իրավասության ներքո են լինելու այն քաղաքացիները, որոնք գտնվում են երկրի սահմաններից դուրս և խուսափում են նշանակված պատժի կատարումից։ Իրավական տեղեկատվության պաշտոնական պորտալում հրապարակված փաստաթղթի համաձայն՝ նոր մարմինը կոչված է ապահովելու նրանց նկատմամբ ժամանակավոր սահմանափակումների կիրառումը։

Հաստատված կարգի համաձայն՝ հանձնաժողովն ունի կոլեգիալ կարգավիճակ և ստեղծվել է համապատասխան դաշնային օրենքի դրույթների կենսագործման նպատակով։ Աշխատանքային խմբում ընդգրկվել են իրավապահ և վերահսկողական հիմնական գերատեսչությունների ներկայացուցիչները, այդ թվում՝ Անվտանգության դաշնային ծառայությունից, Ներքին գործերի նախարարությունից, Գլխավոր դատախազությունից, Արդարադատության նախարարությունից, Դաշնային հարկային ծառայությունից և Ֆինանսական մոնիթորինգի դաշնային ծառայությունից։

Նորաստեղծ կառույցի ղեկավարումը՝ ի պաշտոնե, վերապահված է ՌԴ արդարադատության նախարարին։ Բացի սահմանափակումների կիրառմանն առնչվող գործառույթներից, մարմնի հիմնական խնդիրների շարքում է նաև սոցիալական աջակցության ապահովումը. հանձնաժողովը կքննարկի սեփական եկամուտ չունեցող մերձավոր ազգականներին ամսական մարդասիրական նպաստ հատկացնելու հարցերը, եթե նրանց ընտանիքի անդամի նկատմամբ կիրառվել են նշված սահմանափակումները։