Ուկրաինայից գնահատել են՝ ինչքան ժամանակ կարող է Ռուսաստանը շարունակել պատերազմը

Չնայած Ուկրաինայի դեմ պատերազմի ընթացքում տնտեսական թուլացմանը, Վլադիմիր Պուտինը տիրապետում է բավարար ռեսուրսների՝ մարտական գործողությունները 2027 և 2028 թվականներին շարունակելու համար, հայտարարել է Ուկրաինայի պաշտպանության նախարարության Գլխավոր հետախուզական վարչության (ԳՀՎ) ղեկավար Օլեգ Իվաշչենկոն: «Որպեսզի Ռուսաստանը չունենա այդ ռեսուրսները, անհրաժեշտ է համատեղ աշխատանք գործընկերների հետ: Սանկցիաները պետք է իրապես աշխատեն», — ասել է Իվաշչենկոն «Ուկրինֆորմին» տված հարցազրույցում:

Միևնույն ժամանակ, նրա պնդմամբ, ռուսաստանցիների ավելի քան 60%-ն արդեն դեմ է արտահայտվում պատերազմին: «Դժգոհությունն աճելու է: Դա տնտեսական իրավիճակի և հակառակորդի մեծ մարդկային կորուստների հետևանքն է», — նշել է ԳՀՎ պետը: Նա նաև ընդգծել է, որ պայմանագրայինների ներգրավմամբ զինված ուժերը համալրելու ձևաչափը սպառել է իրեն, քանի որ տարածաշրջանային բյուջեները չեն կարողանում այլևս ֆինանսավորել կամավորներին տրվող վճարումները: «Ընդ որում, ռուսական զորքերի կորուստներն աճում են: Ռուսական կորուստների միջին վիճակագրական ցուցանիշը մեկ օրում կազմում է 1200-ից մինչև 1400 մարդ, հազվադեպ՝ 1500: Խոսքը սպանվածների և ծանր վիրավորների մասին է», — հայտնել է Իվաշչենկոն:

Հունիս ամսին Ուկրաինայի նախագահ Վլադիմիր Զելենսկին բաց նամակ էր հղել Պուտինին՝ ուղղակիորեն մատնանշելով հետախուզական տվյալների առկայությունը, որոնց համաձայն Մոսկվան ծրագրում է պատերազմը երկարաձգել ևս երկու տարի: Նա շեշտում էր, որ ռազմական հակամարտությունն ավելի ու ավելի անձեռնտու է դառնում ռուսաստանցիներին, որոնք բախվում են ուկրաինական անօդաչուների ու հրթիռների հարվածներին, բենզինի դեֆիցիտին, գների աճին և մշտական սահմանափակումներին: «Նրանց դուր չի գալիս, որ ձեր պատերազմի վերջը չի երևում», — ընդգծում էր Զելենսկին՝ կոչ անելով ՌԴ նախագահին դադարեցնել պատերազմը: Ավելի ուշ Ուկրաինայի նախագահը հայտարարեց, որ Պուտինը պատրաստվում է ռազմաճակատ ուղարկել ևս «300-ից 500 հազար մարդ» զորահավաքի միջոցով, քանի որ ՌԴ պաշտպանության նախարարությունը չի կարողանում ապահովել պայմանագրայինների անհրաժեշտ քանակ:

Օգոստոսի վերջին ԱՄՆ նախագահ Դոնալդ Թրամփը Մոսկվա բանակցությունների էր ուղարկել ԿՀՎ ղեկավար Ջոն Ռետկլիֆին: Այցելության ընթացքում Ռետկլիֆը հանդիպումներ էր ունեցել ԱՀԾ և ԱԴԾ տնօրեններ Սերգեյ Նարիշկինի և Ալեքսանդր Բորտնիկովի հետ: Axios-ի աղբյուրները հայտնում էին, որ նա փորձում էր պարզել, թե արդյոք ռուսական հատուկ ծառայությունների ղեկավարները կարող են համոզել Պուտինին վերադառնալ պատերազմի ավարտի շուրջ բանակցային գործընթացին: Ինչպես հայտնում էր The New York Times-ը, Ռետկլիֆը Բորտնիկովին ներկայացրել էր ռուսական բանակի և տնտեսության հեռանկարների «մռայլ գնահատականը»՝ կոչ անելով համաձայնագիր կնքել, քանի դեռ ուշ չէ:

Սեպտեմբերի 5-ին Մոսկվա՝ Պուտինի հետ բանակցությունների նպատակով ժամանել էին Թրամփի հատուկ բանագնացներ Ստիվեն Ուիտկոֆը և Ջարեդ Կուշները: Հաջորդ օրը նրանք մեկնել էին Կիև և հանդիպել Զելենսկու հետ: Financial Times-ի աղբյուրների տվյալներով՝ Թրամփի բանագնացները ներկայացրել էին «քիչ նոր գաղափարներ» և լոկ փորձում էին վերակենդանացնել նախկին առաջարկները:

Պարբերականի զրուցակիցների պնդմամբ՝ Պուտինը նախկինի պես պահանջում է ամբողջական վերահսկողություն Դոնբասի նկատմամբ և պատրաստ է ավարտել պատերազմը բացառապես իր պայմաններով: Ընդ որում, նա համոզված է, որ Դոնեցկի մարզի մնացած 20%-ը ռուսական զորքերը կգրավեն մինչև տարեվերջ: Իր հերթին, Զելենսկին, ինչպես նախկինում, բացառում է տարածքների հանձնումը Ռուսաստանին և Դոնբասի հարցը դիտարկում է որպես առանցքային ամբողջ պատերազմի համար: