Չի ստացվի. Կոսաչովը՝ ՀՀ-ի համար ԵՄ առանց վիզայի ռեժիմի մասին
Աշխարհ
ՌԴ Դաշնության խորհրդի փոխնախագահ Կոնստանտին Կոսաչովը սպասելի է համարել Եվրահանձնաժողովի՝ Հայաստանի հետ առանց վիզայի ռեժիմի ներդրման հստակ ժամկետներ չնշելու դիրքորոշումը։
Ավելի վաղ Եվրահանձնաժողովը չէր հաստատել, որ Հայաստանը կարող է 2029 թվականին ԵՄ-ի հետ առանց վիզայի ռեժիմ ստանալ, ինչի վերաբերյալ հույս էր հայտնել վարչապետ Նիկոլ Փաշինյանը։ Եվրահանձնաժողովի մամուլի ծառայության ղեկավար Պաուլա Պինյուի խոսքով՝ «դեռ վաղ է նման ճշգրտությամբ խոսել»։
Կոսաչովը ՏԱՍՍ-ին ասել է, որ ԵՄ-ն, իր գնահատմամբ, անդամակցության հավակնորդներից պահանջում է «առավելագույն հավատարմություն և զիջումներ», իսկ փոխարենը տալիս է «փայլուն հեռանկարների» մասին խոստումներ։
«Այս իրավիճակում անսպասելին միայն Հայաստանի ներկայիս ղեկավարության՝ նման հավաստիացումների նկատմամբ ոչնչով չհիմնավորված վստահությունն է»,- ասել է ռուս սենատորը։
Նա նաև պնդել է, որ եթե Երևանը փորձում է օգտվել Հայաստանի համար տարբեր ուժային կենտրոնների մրցակցությունից, ապա «դա չի ստացվի»։
Փաշինյանը 2029 թվականին ԵՄ-ի հետ առանց վիզայի ռեժիմ ունենալու մտադրության մասին հայտարարել էր հուլիսի 2-ին Երևանում Եվրահանձնաժողովի նախագահ Ուրսուլա ֆոն դեր Լայենի հետ համատեղ ասուլիսի ժամանակ։
ՈՒՂԻՂ ԵԹԵՐ
Ամենադիտված 
Դիրքում բռնшբшրnւթյшն դեպքը տեսած, ապա սպшնված 3 զինվորների ծնողներն արդարադատություն են պահանջում (տեսանյութ)
