Աշխարհում ժամանակի հաշվարկը պատրաստվում են «անջատել» Երկրի պտույտից

Միջազգային կազմակերպությունները պատրաստվում են փոխել համաշխարհային ժամանակի հաշվարկման սկզբունքը՝ այն այլևս խստորեն չկապելով Երկրի ֆիզիկական պտույտի հետ։ Այս մասին գրում է The Times-ը՝ հղում անելով Մեծ Բրիտանիայի Ազգային ֆիզիկական լաբորատորիայի աշխատակից Սեթնամ Շեմարին։

Ներկայում համակարգված համաշխարհային ժամանակը՝ UTC-ն, հիմնված է ատոմային ժամացույցների վրա, սակայն պարբերաբար ճշգրտվում է՝ Երկրի պտույտի հետ համապատասխանությունը պահպանելու համար։ 1972 թվականից ի վեր այդ նպատակով 27 լրացուցիչ վայրկյան է ավելացվել։ Սակայն վերջին շրջանում Երկրի պտույտի արագացումը առաջին անգամ առաջացրել է հակառակ գործողության՝ մեկ վայրկյան հանելու հնարավոր անհրաժեշտություն։

Մասնագետները զգուշացնում են, որ այսպես կոչված «բացասական նահանջ վայրկյանը» կարող է խնդիրներ առաջացնել համակարգչային ծրագրերի համար, որոնց մի մասը նախատեսված է միայն լրացուցիչ վայրկյան ավելացնելու համար։ Հնարավոր խափանումները կարող են անդրադառնալ արբանյակային նավիգացիայի, հեռահաղորդակցության, էներգետիկ համակարգերի և ֆինանսական շուկաների վրա։

Այդ ռիսկերից խուսափելու համար առաջարկվում է դադարեցնել UTC-ն նահանջ վայրկյանների միջոցով Երկրի պտույտին պարբերաբար համապատասխանեցնելու պրակտիկան։ Արդյունքում ատոմային և աստղագիտական ժամանակների միջև տարբերությունը շատ դանդաղ կմեծանա․ մասնագետների գնահատմամբ՝ մեկ ժամի հասնելու համար կպահանջվեն հազարավոր տարիներ։