Քննարկվում է հայկական ապրանքների արտահանումը Ինդոնեզիա

ԱԺ տարածաշրջանային և եվրասիական ինտեգրման հարցերի մշտական հանձնաժողովը դրական եզրակացություն է տվել Եվրասիական տնտեսական միության և Ինդոնեզիայի միջև ազատ առևտրի համաձայնագրի վավերացման նախագծին։

Համաձայնագրի նպատակն է նվազեցնել մաքսային և ոչ մաքսային խոչընդոտները և խթանել ապրանքների փոխադարձ առևտուրը։

Հայաստանի համար նախատեսված արտոնությունների ցանկում ներառվել են արտահանման առաջնային հետաքրքրություն ներկայացնող ապրանքներ։ Մասնավորապես՝ հանքային ջրերի, պահածոյացված մրգերի ու բանջարեղենի և մրգային հյութերի դեպքում գործող մաքսատուրքերը համաձայնագրի ուժի մեջ մտնելուց հետո կնվազեն մինչև 0%։ Ջեմերի մաքսատուրքը կնվազի 50%-ով։

Արդյունաբերական ապրանքներից արտոնություններ են նախատեսվում նաև պղնձե արտադրանքի, դեղամիջոցների և ոսկերչական իրերի համար՝ որոշ ապրանքների դեպքում մաքսատուրքերի աստիճանական նվազեցմամբ մինչև 0%։

Համաձայնագիրը ստորագրվել է 2025 թվականի դեկտեմբերի 21-ին՝ Սանկտ Պետերբուրգում։