Պուտինը և Թրամփը հեռախոսազրույց են անցկացրել. զրույցը տևել է մեկ ժամ
Աշխարհ
Ռուսաստանի նախագահ Վլադիմիր Պուտինը և ԱՄՆ նախագահ Դոնալդ Թրամփը հեռախոսազրույց են անցկացրել, որը տևել է ուղիղ մեկ ժամ։ Զրուցակիցները հիմնական ուշադրությունը դարձրել են ուկրաինական կարգավորման հարցերին, հայտնել է Ռուսաստանի նախագահի օգնական Յուրի Ուշակովը, հաղորդում է ТАСС-ը։
Նշվում է, որ Պուտինն ու Թրամփը քննարկել են ԱՄՆ նախագահի հատուկ բանագնաց Սթիվ Ուիթքոֆի և Ջարեդ Քուշների՝ վերջերս Մոսկվա և Կիև կատարած այցերի արդյունքները։ Կողմերը դրական են գնահատել այդ ուղղությամբ աշխատանքը և պայմանավորվել շարունակել այն։
Զրույցի ընթացքում Պուտինը Թրամփին ներկայացրել է հատուկ ռազմական գործողության գոտում տեղի ունեցողի «օբյեկտիվ և հանգամանալից վերլուծությունը»։ Իր հերթին, ԱՄՆ նախագահը հայտարարել է, որ շահագրգռված է իր նախագահական ժամկետի ընթացքում ուկրաինական հակամարտության կարգավորման հարցում բեկման հասնելու մեջ։
Պուտինը միաժամանակ վստահեցրել է Թրամփին, որ Ռուսաստանը Եվրոպայի նկատմամբ ագրեսիվ ծրագրեր «նույնիսկ մտքում չունի»։ Ռուսաստանի նախագահը դրական է գնահատել հակամարտության լուծման ուղիների որոնման հարցում ԱՄՆ-ի միջնորդական ջանքերը։
Առանձին Պուտինը նշել է նաև ռուս և ուկրաինացի երեխաներին իրենց ընտանիքներ վերադարձնելու գործում ԱՄՆ առաջին տիկին Մելանիա Թրամփի ջանքերը։
Ուշակովի բնորոշմամբ՝ զրույցն անցել է դրական մթնոլորտում։ Պուտինն ու Թրամփը պայմանավորվել են կապի մեջ մնալ և անհրաժեշտության դեպքում օպերատիվ կերպով նոր հեռախոսային բանակցություններ անցկացնել։
ՈՒՂԻՂ ԵԹԵՐ
Ամենադիտված 
Դիրքում բռնшբшրnւթյшն դեպքը տեսած, ապա սպшնված 3 զինվորների ծնողներն արդարադատություն են պահանջում (տեսանյութ)
