Լադոգա լճի հատակին Երկրորդ համաշխարհային պատերազմի տարիների չորս ավտոմեքենա է հայտնաբերվել

Լադոգա լճի հատակին ջրասուզակները հայտնաբերել են Երկրորդ համաշխարհային պատերազմի տարիներին խորտակված չորս ավտոմեքենա։ Այս մասին ՌԻԱ Նովոստիին հայտնել է «Դիվո» ստորջրյա ակումբի ղեկավար Սերգեյ Կուլիկովը։

Մոտ 30-35 մետր խորության վրա հայտնաբերվել են երկու բեռնված ԳԱԶ-ԱԱ բեռնատար, խորհրդային առաջին լիմուզիններից ԶԻՍ-101-ը և հազվագյուտ կարմիր ամերիկյան GRAHAM ավտոմեքենա՝ քրոմապատ անվահեծերով։ Մեքենաները ջրի տակ կանգնած են միմյանց հետևից՝ գրեթե մեկ շարքով։

Հետազոտողների վարկածով՝ մեքենաները կարող էին ջուրը նետվել №752 բեռնանավից, որը հայտնի է որպես «Լադոգայի Տիտանիկ»։ Այն խորտակվել է 1941 թվականի սեպտեմբերի 17-ի գիշերը՝ պաշարված Լենինգրադից մարդկանց տարհանման ժամանակ։ Փոթորկի ընթացքում նավը վնասվել էր, ապա ենթարկվել գերմանական օդային հարձակման։ Տարբեր գնահատականներով՝ աղետի հետևանքով կարող էր զոհվել մինչև 1500 մարդ։

Ականատեսների վկայությունների համաձայն՝ նավի տախտակամածին մի քանի մեքենա է եղել, որոնցից մեկը՝ կարմիր։ Ջրասուզակները ենթադրում են, որ դրանք մյուս բեռների հետ ջուր են նետվել՝ նավը թեթևացնելու և մարդկանց փրկելու փորձի ժամանակ։