Եվրոպան լրջորեն հետ է մնում ԱՄՆ-ից և Չինաստանից տիեզերական մրցավազքում․ FT

Եվրոպան տիեզերական մրցավազքում զգալիորեն զիջում է ԱՄՆ-ին և Չինաստանին, իսկ այդ տարբերությունը գնալով ավելի ակնհայտ է դառնում։ Այս մասին գրում է Financial Times-ը։

Պարբերականի տվյալներով՝ Եվրոպայի՝ տիեզերքում ինքնուրույն գործելու սահմանափակ հնարավորությունները կարող են ռիսկեր ստեղծել նրա պաշտպանության, անվտանգության և կապի համակարգերի համար։ Հետընթացը հատկապես նկատելի է հրթիռների արձակման և արբանյակային համակարգերի ստեղծման ոլորտներում։

Եվրոպական տիեզերական գործակալության ղեկավար Յոզեֆ Աշբախերը խոստովանել է, որ Եվրոպան մի շարք ուղղություններով պետք է արագորեն լրացնի բացը և մեծացնի իր անկախությունը։ Նրա խոսքով՝ ներկայում մարդկանց տիեզերք ուղարկելու սեփական հնարավորություններ ունեն միայն Ռուսաստանը, ԱՄՆ-ը և Չինաստանը։

Financial Times-ը նաև նշում է, որ Եվրոպան զգալիորեն զիջում է SpaceX-ին հրթիռների արձակման քանակով․ եվրոպական տարեկան շուրջ մեկ տասնյակ արձակման դիմաց ամերիկյան ընկերությունն իրականացնում է մոտ 170-ը։ Բացի այդ, Եվրոպան դեռ չի ստեղծել SpaceX-ի հրթիռներին համարժեք բազմակի օգտագործման հրթիռային համակարգ։