Ավինյանը հաստատել է․ Աջափնյակի մետրոյի ծրագրի ցանկում ռուսական ընկերություններ կան

Աջափնյակի մետրոյի ծրագրի կառավարչի ընտրության համար արդեն կազմվել է հնարավոր ընկերությունների ցանկ, որում նաև ռուսական ընկերություններ կան։ Այս մասին լրագրողների հետ զրույցում հայտարարել է Երևանի քաղաքապետ Տիգրան Ավինյանը։

Նրա խոսքով՝ ընկերություններին հրավերներ կուղարկվեն, որից հետո մրցութային կարգով կընտրվի ծրագրի կառավարիչը։ Վերջինս, իր ինժեներներով, կիրականացնի նաև ծրագրի տեխնիկական վերահսկողությունը։

Ավինյանի խոսքով՝ ծրագրի հաջորդ փուլում պետք է ընտրվի մետրոյի շինարարությունն իրականացնող ընկերությունը։ Նա նշել է, որ կառուցողների մասով ևս որոշակի պատկերացումներ կան։

Ազատության ճշտող հարցին՝ հնարավո՞ր է ծրագրում ռուսական կողմի ներգրավումը, քաղաքապետը պատասխանել է, որ դա «ցույց կտա կյանքը»։ Միաժամանակ նա հաստատել է, որ դիտարկվող ընկերությունների ցանկում ռուսական ընկերություններ կան։