Apple-ն այսօր կարող է ներկայացնել իր առաջին ծալվող iPhone-ը․ ինչ է հայտնի նորույթի մասին

Apple-ը սեպտեմբերի 9-ին կանցկացնի իր ամենամյա աշնանային շնորհանդեսը, որի ընթացքում, ինչպես սպասվում է, կներկայացվեն iPhone 18 Pro-ն, iPhone 18 Pro Max-ը, նոր Apple Watch-ը, AirPods 5-ը և ընկերության առաջին ծալվող սմարթֆոնը։ Ըստ հրապարակված տեղեկությունների՝ այն կարող է ստանալ iPhone Duo անվանումը։

Ծալվող iPhone-ը, ըստ արտահոսքերի, կունենա գրքի նման բացվող կառուցվածք՝ մոտ 5,5 դյույմանոց արտաքին և 7,8 դյույմանոց ներքին էկրաններով։ Բացված վիճակում սարքի հաստությունը կարող է կազմել ընդամենը 4,5 մմ, իսկ փակ վիճակում՝ մոտ 9 մմ։ Սպասվում է տիտանե կորպուս, իսկ Face ID-ի փոխարեն կարող է օգտագործվել միացման կոճակի մեջ տեղադրված Touch ID։

Նախնական տվյալներով՝ iPhone Duo-ի գինը ԱՄՆ-ում կսկսվի մոտ 2000 դոլարից, իսկ 2 ՏԲ հիշողությամբ տարբերակը կարող է արժենալ մինչև 3000 դոլար։ Սարքի վաճառքը, ըստ աղբյուրների, նախատեսվում է սկսել հոկտեմբերին։

iPhone 18 Pro-ի մեկնարկային գինն, իր հերթին, կարող է կազմել 1200 դոլար։ Նոր Pro մոդելներին վերագրվում են A20 Pro 2-նանոմետրանոց պրոցեսոր, 12 ԳԲ օպերատիվ հիշողություն և փոփոխական դիաֆրագմայով հիմնական տեսախցիկ։ Նշված բնութագրերն ու գները դեռևս պաշտոնապես չեն հաստատվել և հիմնված են շնորհանդեսից առաջ տարածված արտահոսքերի վրա։