Նեթանյահուն հերքել է հոկտեմբերի 7-ին ՀԱՄԱՍ-ի հարձակման մասին ԱՄԷ-ի նախազգուշացումների վերաբերյալ հրապարակումները

Իսրայելի վարչապետ Բենիամին Նեթանյահուն հերքել է այն տեղեկությունները, որ ԱՄԷ իշխանությունները անձամբ են զգուշացրել իրեն 2023 թվականի հոկտեմբերի 7-ից կարճ ժամանակ առաջ արմատական ​​պաղեստինյան ՀԱՄԱՍ կազմակերպության կողմից անխուսափելի հարձակման սպառնալիքի մասին: Նա «Հաարեց»-ի հաղորդագրությունն անվանել է զրպարտչական և հայտարարել դրա հեղինակներին դատի տալու մտադրության մասին։

«Վարչապետը հանձնարարել է իր փաստաբաններին զրպարտության հայց ներկայացնել ձախակողմյան «Հաարեց» թերթի, Շլոմի Էլդարի և այլոց դեմ, որոնք զրպարտություն են տարածել վարչապետի դեմ՝ մի պատմություն, որը երբեք էլ գոյություն չի ունեցել: Հակառակ պնդումների, սեպտեմբերի սկզբից մինչև 2023 թ․ հոկտեմբերի 7-ը վարչապետի և Արաբական Միացյալ Էմիրությունների նախագահի միջև ոչ մի զրույց չի տեղի ունեցել», - ասվում է Նեթանյահուի X էջում տեղադրված գրառման մեջ։

Նեթանյահուի խոսքով՝ վարչապետի գրասենյակը, Ազգային անվտանգության խորհուրդը և Ռազմական քարտուղարությունը մանրակրկիտ ուսումնասիրել են վարչապետի՝ այդ օրերի զանգերի գրանցամատյանները և չեն գտել նման զրույցի մասին որևէ հիշատակում:

«Որպես կանոն, վարչապետի և ԱՄԷ նախագահի միջև դիվանագիտական ​​զրույցները տեղի են ունենում բացառապես վարչապետի աշխատակազմում՝ ԱՄԷ ներկայացուցչի միջոցով, որը գրասենյակ է ժամանում հատուկ կոդավորված սարքով։ Այս բոլոր զրույցները փաստաթղթավորված են», - նշվում է գրառման մեջ։