Վանաձորն ու Արարատը կխոշորացվեն․ նախագիծը դրական եզրակացություն ստացավ

ՀՀ Կառավարությունը հանդես է եկել «ՀՀ վարչատարածքային բաժանման մասին» և «Տեղական ինքնակառավարման մասին» օրենքներում փոփոխություններ կատարելու նախաձեռնությամբ։ Առաջարկվում է Լոռու մարզի Վանաձոր և Փամբակ համայնքների միավորմամբ ստեղծել նոր՝ Վանաձոր խոշորացված համայնքը՝ 22 բնակավայրով, իսկ Արարատի մարզի Արարատ և Վեդի համայնքների միավորմամբ՝ նոր՝ Արարատ խոշորացված համայնքը՝ 32 բնակավայրով։

Տարածքային կառավարման և շրջակա միջավայրի պահպանության հարցերի մշտական հանձնաժողովում նախագիծը ներկայացրել է ՀՀ տարածքային կառավարման և ենթակառուցվածքների նախարարի տեղակալ Առնակ Ավետիսյանը։ Նա տեղեկացրել է, որ միավորման ծրագրի շուրջ անցկացվել են հանրային լսումներ համայնքների ներկայացուցիչների մասնակցությամբ։

Փոխնախարարի փոխանցմամբ՝ 2016 թվականից կիրառվող փնջային և շրջանային մոդելներից, ըստ տեղական ու միջազգային հետազոտությունների, շրջանայինն առավել արդյունավետ է։ Այն նպաստում է բնակիչներին մատուցվող ծառայությունների որակի բարձրացմանը, կարողությունների ամրապնդմանը և ՏԻՄ ոլորտի բարեփոխումների իրականացմանը։ Օրենսդրական փաթեթի ընդունմամբ կձևավորվի 62 համայնք՝ 55 բազմաբնակավայր համայնքներով։

Քննարկման ընթացքում «Ուժեղ Հայաստան» ընդդիմադիր խմբակցության պատգամավորները մտահոգություն են հայտնել քննարկումների ոչ բավարար լինելու վերաբերյալ՝ պնդելով, որ նախագիծը պայմանավորված է քաղաքական նպատակահարմարությամբ։ «Քաղաքացիական պայմանագիր» խմբակցության պատգամավորները հակադարձել են՝ նշելով, որ գործընթացի նպատակը բոլոր համայնքների բնակիչների համար հավասար պայմանների ապահովումն է։

Ելույթների և հարցուպատասխանի ընթացքում անդրադարձ է կատարվել ֆինանսավորմանը, ենթակառուցվածքներին, ծառայություններին, ինչպես նաև տեղական հանրաքվեով միավորումն իրականացնելու նպատակահարմարությանը։ Ընդգծվել է, որ խոշորացումը համայնքների զարգացման արդյունավետ ճանապարհներից է։ Փոխնախարարը պարզաբանումներ է տվել բարձրացված հարցերին, ինչից հետո նախագիծը ստացել է հանձնաժողովի դրական եզրակացությունը։