30 տարվա աշխատանքային ստաժ ունեցող դասախոսին ազատել են աշխատանքից՝ Instagram-ի երկու հրապարակումների պատճառով

Սանկտ Պետերբուրգի Ա. Ի. Հերցենի անվան Ռուսաստանի պետական մանկավարժական համալսարանի համաշխարհային պատմության ամբիոնի վարիչ Տատյանա Կուդրյավցևան աշխատանքից ազատվել է։

65-ամյա դասախոսը համալսարանում աշխատել է շուրջ 30 տարի, իսկ 2009 թվականից ղեկավարել է համաշխարհային պատմության ամբիոնը։

«Осторожно, новости»-ի փոխանցմամբ՝ աշխատանքից ազատման պատճառ են դարձել 2020 և 2021 թվականներին նրա Instagram-ում կատարած երկու հրապարակումները։

Առաջին հրապարակման մեջ տեղադրված է եղել Սանկտ Պետերբուրգի բակերից մեկում արված գրաֆիտիի լուսանկար, որը վերաբերում էր Ալեքսեյ Նավալնիին։

Երկրորդ հրապարակման մեջ Կուդրյավցևան պատկերված է եղել իր տան բակում՝ լապտերով, իսկ լուսանկարին կից եղել է լատիներեն «Omnia vincit amor» արտահայտությունը, որը թարգմանաբար նշանակում է՝ «Սերը հաղթում է ամեն ինչ»։

Կուդրյավցևայի աշխատանքից ազատման հանգամանքները քննարկվում են նաև ռուսական հասարակական և մեդիա դաշտում։