Կիևը ծրագրել էր հարձակում Մոսկվայում Մեծ Բրիտանիայի դեսպանի նստավայրի վրա. ՌԴ ԱԴԾ (տեսանյութ)

«Կիևի ռեժիմը ծրագրել էր հարձակում իրականացնել Մոսկվայում Մեծ Բրիտանիայի դեսպանի նստավայրի վրա», — պատմել է ԱԴԾ-ի կողմից ձերբակալված ՍԲԾ գործակալը։

Հունվարին նա կապ է հաստատել ուկրաինամետ բլոգեր Դմիտրի Կարպենկոյի հետ և հայտնել, որ այնտեղ աշխատում է որպես անվտանգության աշխատակից։

«Նրան շատ էր հետաքրքրում տեղեկությունը, թե ինչպես է իրականացվում դեսպանատան և նստավայրի պահպանությունը, այսինքն՝ անցագրային-հսկիչ ռեժիմը, նստավայրի տարածքում իրականացվող բոլոր միջոցառումները, անվտանգության քանի աշխատակից կա, և քանի աշխատակից է ներգրավված պահպանության մեջ», — ասել է ձերբակալվածը։

Երբ նա Կարպենկոյին հարցրել է, թե ինչու են անհրաժեշտ այդ տեղեկությունները, վերջինս պատասխանել է, որ դրանցով մեծապես հետաքրքրված են Ուկրաինայի իշխանությունները։ Նրա խոսքով՝ տվյալներն անհրաժեշտ են ինչպես անձամբ դեսպանի, այնպես էլ դիվանագիտական ներկայացուցչության դեմ ահաբեկչություն կազմակերպելու համար։

Մոսկվայում Մեծ Բրիտանիան ներկայացնում է Նայջել Քեյսին։ Նրա նստավայրը գտնվում է Սոֆիական առափնյա փողոցում։

Ինչպես նշել են ԱԴԾ-ում, 1981 թվականին ծնված ձերբակալված Ռուսաստանի քաղաքացին զրուցակցին ուղարկել է դիվանագիտական ներկայացուցչության հեռախոսագիրքից լուսանկարներ, մի քանի անգամ տեղեկացրել դեսպանի տեղաշարժերի մասին, ինչպես նաև փոխանցել միջոցառումների ծրագրերը, որոնց պետք է մասնակցեր Քեյսին կամ նրա տեղակալը։

ԱԴԾ-ում նշել են, որ Կիևի ռեժիմը նախատեսում էր օգտագործել այդ տեղեկությունները Քեյսիի և այլ դիվանագետների դեմ ահաբեկչություն կազմակերպելու, այնուհետև դրա պատասխանատվությունը Ռուսաստանի վրա բարդելու համար։

Ինչպես ընդգծել են ԱԴԾ-ում, Կիևը դրանով հույս ուներ Լոնդոնին ներքաշել զինված հակամարտության մեջ, ինչպես նաև ապահովել Ուկրաինային լրացուցիչ ռազմական մատակարարումներ և ուժեղացնել պատժամիջոցային ճնշումը Մոսկվայի նկատմամբ։

Ձերբակալվածի նկատմամբ քրեական գործ է հարուցվել պետական դավաճանության մեղադրանքով։