Դելին ուժեղացնում է անվտանգության միջոցառումները BRICS-ի գագաթնաժողովից առաջ․ տեղադրվել է 500 տեսախցիկ

Հնդկաստանի մայրաքաղաք Նյու Դելին ավարտում է սեպտեմբերի 12-13-ը կայանալիք BRICS-ի 18-րդ գագաթնաժողովի նախապատրաստական աշխատանքները։ Միջազգային հանդիպմանն ընդառաջ քաղաքում ուժեղացվել են անվտանգության, տեսահսկման և երթևեկության վերահսկման միջոցառումները։

Գագաթնաժողովի անցկացման վայրի և բարձրաստիճան պատվիրակությունների երթուղիների երկայնքով տեղադրվել է շուրջ 500 տեսախցիկ, որոնցից մի մասը կարող է ավտոմատ ճանաչել ավտոմեքենաների համարանիշները։ Տեսախցիկների աշխատանքին հետևելու համար ստեղծվել է հատուկ վերահսկման կենտրոն, որը կկարողանա կասկածելի գործողությունների դեպքում անմիջապես տեղեկացնել համապատասխան ծառայություններին։

Դելիի ոստիկանությունը մշակել է անվտանգության բազմաստիճան ծրագիր՝ ներառելով ուժեղացված հսկողություն, երթևեկության սահմանափակումներ և արագ արձագանքման մեխանիզմներ։ Գագաթնաժողովի պատճառով փոփոխություններ են կատարվել նաև մի շարք դատական նիստերի ժամանակացույցում։

BRICS-ի գագաթնաժողովը կհյուրընկալի Հնդկաստանի վարչապետ Նարենդրա Մոդին։ Նյու Դելի են ժամանելու կազմակերպության անդամ և գործընկեր երկրների ղեկավարներ, միջազգային կազմակերպությունների ներկայացուցիչներ և այլ բարձրաստիճան պաշտոնյաներ։