Ֆրանսիացի տնտեսագետը բացատրել է՝ ինչու պատժամիջոցները չեն կանգնեցրել Ռուսաստանի տնտեսության աճը

Արևմտյան պատժամիջոցները համեմատաբար քիչ ազդեցություն են ունեցել Ռուսաստանում արտադրության վրա, ինչի շնորհիվ երկրի տնտեսությունը շարունակում է աճել։ Նման գնահատական է տվել ֆրանսիացի տնտեսագետ, Սոցիալական գիտությունների բարձրագույն դպրոցի (EHESS) հետազոտությունների տնօրեն Ժակ Սապիրը։

Նրա խոսքով՝ պատժամիջոցների պայմաններում Ռուսաստանին հաջողվել է պահպանել գնողունակության համարժեքությամբ (ԳՀ) հաշվարկված ՀՆԱ-ի բարձր ցուցանիշը հենց այն պատճառով, որ սահմանափակումների ազդեցությունն արտադրության վրա սպասվածից փոքր է եղել։

Նյութում ներկայացված ԱՄՀ տվյալների համաձայն՝ նախորդ տարվա արդյունքներով Ռուսաստանի ՀՆԱ-ն գնողունակության համարժեքությամբ առաջին անգամ գերազանցել է 7 տրլն դոլարը, ինչով երկիրը զբաղեցրել է չորրորդ տեղն աշխարհում՝ Չինաստանից, ԱՄՆ-ից և Հնդկաստանից հետո։

ԱՄՀ-ի կանխատեսմամբ՝ 2026 թվականին Ռուսաստանի ՀՆԱ-ն գնողունակության համարժեքությամբ կարող է կազմել մոտ 7,34 տրլն դոլար։ Սապիրի գնահատականը, սակայն, վերաբերում է հենց այս ցուցանիշին և պատժամիջոցների՝ արտադրության վրա ազդեցությանը, այլ ոչ Ռուսաստանի տնտեսության բոլոր ոլորտներին։