Տվյալների մշակման կենտրոնները բարձրացնում են ուրանի համաշխարհային գները․ WSJ

Տվյալների մշակման կենտրոնների էլեկտրաէներգիայի սպառման արագ աճը մեծացնում է հետաքրքրությունը ատոմային էներգետիկայի նկատմամբ և նպաստում ուրանի պահանջարկի ու գների բարձրացմանը։ The Wall Street Journal-ի տվյալներով՝ ուրանի երկարաժամկետ պայմանագրային գները հասել են առնվազն վերջին 18 տարվա առավելագույն ցուցանիշին։

UxC վերլուծական ընկերության տվյալներով՝ U3O8 ուրանի խտանյութի սփոթային գինը մոտեցել է մեկ ֆունտի դիմաց 90 դոլարին։ Խոշոր տեխնոլոգիական ընկերությունները տվյալների կենտրոնների անխափան էլեկտրամատակարարումն ապահովելու համար ավելի մեծ ուշադրություն են դարձնում ատոմային էներգիային։

Պահանջարկի աճը պայմանավորված է ոչ միայն տվյալների կենտրոններով։ Մի շարք երկրներ ներդրումներ են կատարում նոր ատոմային էներգետիկ նախագծերում՝ էներգետիկ անվտանգությունն ամրապնդելու և հանածո վառելիքից կախվածությունը նվազեցնելու նպատակով։ Միաժամանակ ուրանի առաջարկի աճը հետ է մնում շուկայի սպասումներից, ինչը կարող է առաջիկա տարիներին պահպանել դեֆիցիտը։

Jefferies-ը ուրանի երկարաժամկետ գնային կանխատեսումը բարձրացրել է 36%-ով՝ մինչև 95 դոլար մեկ ֆունտի դիմաց, իսկ Citi-ի վերլուծաբանները չեն բացառում, որ հաջորդ տարվա վերջին գինը կարող է հասնել մինչև 140 դոլարի։ WSJ-ն, սակայն, նշում է, որ ատոմային էներգետիկայի զարգացման կամ տվյալների կենտրոնների կառուցման տեմպերի դանդաղումը կարող է սահմանափակել ուրանի պահանջարկի հետագա աճը։