Ֆիլիպիններում լաստանավի հրդեհի հետևանքով 5 մարդ զոհվել է, ավելի քան 80-ը՝ անհետ կորել

Ֆիլիպինների արևմտյան Պալավան կղզու մոտ ուղևորատար լաստանավում խոշոր հրդեհ է բռնկվել, որի հետևանքով առնվազն 5 մարդ զոհվել է, իսկ ավելի քան 80-ի գտնվելու վայրն առայժմ անհայտ է։ Reuters-ի փոխանցմամբ՝ տարածքում լայնածավալ որոնողափրկարարական գործողություն է իրականացվում։

Ֆիլիպինների առափնյա պահպանության տվյալներով՝ լաստանավում եղել է 117 ուղևոր և անձնակազմի 17 անդամ։ Այս պահին փրկվել է 43 մարդ, որոնց թվում են Չիլիի երկու քաղաքացիներ։ Որոնողական աշխատանքներին ներգրավվել են մի քանի նավեր, իսկ համապատասխան եղանակային պայմանների դեպքում նախատեսվում է օգտագործել նաև օդային միջոցներ։

Փրկարարները դեռ չեն կարողանում մուտք գործել այրված լաստանավ․ աշխատանքներին խանգարում են թանձր ծուխը, բարձր ջերմաստիճանը և հնարավոր պայթյունների վտանգը։ Բացի այդ, քամու և հոսանքների պատճառով նավը գիշերվա ընթացքում հեռացել է հրդեհի սկզբնական վայրից։

Լաստանավը Մանիլայից ուղևորվում էր դեպի Պալավանի հայտնի զբոսաշրջային ուղղություն Կորոն։ Հրդեհի առաջացման պատճառները դեռևս հետաքննվում են։