Եվրոպական խորհրդարանը սեպտեմբերի 15-ին կքվեարկի Հայաստանի համար մաքսային արտոնություններ սահմանելու հարցով

Եվրոպական խորհրդարանի լիագումար նիստում սեպտեմբերի 15-ին քվեարկության կդրվի Հայաստանից ԵՄ ներմուծվող մի շարք ապրանքների համար մաքսատուրքերի ժամանակավոր վերացման առաջարկը։

Եվրախորհրդարանի կայքում հրապարակվել է սեպտեմբերի 14-17-ը Ստրասբուրգում կայանալիք Եվրախորհրդարանի լիագումար նիստերի օրակարգը, որոնց թվում է նաև Հայաստանի համար մաքսային արտոնություններ սահմանելու վերաբերյալ Եվրահանձնաժողովի առաջարկի քվեարկությունը, որին ավելի վաղ հավանություն էր տվել ԵՄ խորհուրդը։

Նախատեսվում է երկու տարով վերացնել հայկական մի շարք ապրանքների նկատմամբ կիրառվող մաքսատուրքերը և առանց մաքսատուրքի ներմուծման քվոտաներ սահմանել հայկական գյուղատնտեսական ութ տեսակի արտադրանքի համար, այդ թվում՝ խաղողի, ծիրանի, կեռասի, դեղձի և վարունգի։

Առաջարկը ներառում է նաև պաշտպանական մեխանիզմներ, որոնք անհրաժեշտության դեպքում թույլ կտան ԵՄ-ին սահմանափակել ներմուծումը, եթե դրա աճը բացասաբար ազդի եվրոպացի արտադրողների վրա։

Նախաձեռնությունը ԵՄ-ն դիտարկում է որպես ժամանակավոր միջոց՝ հայկական տնտեսությանն աջակցելու և արտահանողների համար եվրոպական շուկա մուտքի լրացուցիչ հնարավորություններ ստեղծելու նպատակով։