COP17-ի համար Երևանում նոր ենթակայան է կառուցվում․ ՀԷՑ-ը շուրջ 2 մլրդ դրամ է ներդնում

«Հայաստանի էլեկտրական ցանցեր» ՓԲԸ-ի ժամանակավոր կառավարիչ Ռոմանոս Պետրոսյանն այցելել է ՀԷՑ-ի «Կենտրոնական» 110/35/6 կՎ և կառուցվող «Նորագյուղ» 35/6 կՎ ենթակայաններ։

COP17-ի և դրա շրջանակում նախատեսված միջոցառումների ընթացքում անխափան էլեկտրամատակարարում ապահովելու նպատակով կառուցվող «Նորագյուղ» ենթակայանի աշխատանքները մոտենում են ավարտին։ Ծրագրով նախատեսվում է նաև 5 նոր ցածր լարման ենթակայանի ստեղծում, որոնցից երեքն արդեն պատրաստ են գործարկման։

COP17-ի ընթացքում հուսալի սնուցում ապահովելու համար վերազինվել է նաև «Կենտրոնական» ենթակայանը։ Տեղադրվել է 63 ՄՎԱ հզորությամբ երրորդ տրանսֆորմատորը, ավելացվել է երրորդ 6 կՎ սեկցիան, ինչպես նաև կառուցվել են 35 կՎ օդային և մալուխային գծեր։ Աշխատանքները ներառում են նաև նոր 6 կՎ մալուխագծերի անցկացում և ենթակայանների մոնտաժում։

ՀԷՑ-ի փոխանցմամբ՝ ծրագրի ընդհանուր բյուջեն կազմում է շուրջ 2 մլրդ դրամ։ Նոր ենթակայանը նախատեսվում է օգտագործել նաև Կենտրոն վարչական շրջանի էներգամատակարարման բարելավման և ապագայում կառուցվելիք Նորագյուղ թաղամասի էլեկտրամատակարարման համար։