Մինչև 2031 թվականը Հայաստանը առնվազն երեք արբանյակ կարձակի․ Փաշինյան

ՀՀ վարչապետ Նիկոլ Փաշինյանը Ֆրանսիայում անցկացվող միջազգային տիեզերական գագաթնաժողովում ներկայացրել է Հայաստանի տիեզերական կարողությունների զարգացման ծրագրերը։

Փաշինյանի խոսքով՝ Հայաստանի 2026-2031 թվականների կառավարության ծրագիրը նախատեսում է շահագործման հանձնել առնվազն երեք արբանյակ՝ երկուսը Երկրի դիտարկման, մեկը՝ հեռահաղորդակցության նպատակներով։ Միաժամանակ նախատեսվում է զարգացնել ինքնիշխան ցամաքային ենթակառուցվածքներ և արբանյակների կառավարման, տվյալների ընդունման, մշակման ու վերլուծության ներքին կարողություններ։

Վարչապետը նշել է, որ Հայաստանը ցանկանում է ավելի ակտիվորեն մասնակցել միջազգային տիեզերական ծրագրերին՝ հնարավորություն տալով հայ ինժեներներին և ընկերություններին ներգրավվել տիեզերքի ուսումնասիրման բարդ համակարգերի ու սարքավորումների նախագծման, մշակման և արտադրության գործընթացներում։

Փաշինյանը նաև նշել է տիեզերական տեխնոլոգիաների և արհեստական բանականության զարգացման կապը։ Նրա խոսքով՝ Հայաստանում մշակվում է «AI գործարանների այգի» ազգային հայեցակարգը, իսկ վերջերս NVIDIA-ի հետ համագործակցությամբ Հայաստանում բացվել է «Firebird» արհեստական բանականության գործարանը։

Նա ընդգծել է նաև զարգացող Ակադեմիական քաղաքի դերը՝ որպես կրթության, գիտության և արդյունաբերության միջև կապերի ամրապնդման և առաջատար հետազոտությունների ու տեխնոլոգիական զարգացման նոր միջավայր։