Վենեսուելայում կործանվել է ուկրաինացի մոդելի և երկու գործարարի տեղափոխող ինքնաթիռը

Վենեսուելայի Բոլիվար նահանգում թեթևաշարժ ինքնաթիռ է ընկել․ օդանավում գտնվող երկու տեղացի գործարարները, ուկրաինացի մոդելն ու ևս երկու ուղևոր ողջ են մնացել։ Ինչպես հայտնում է El Pitazo պարբերականը, նրանց առողջական վիճակի մասին հստակ տեղեկություններ դեռևս չկան։

YV2199 գրանցման համարով ինքնաթիռը վթարի է ենթարկվել կիրակի օրը՝ սեպտեմբերի 6-ին, Սյուդադ Բոլիվարում՝ «Կանայմա» ազգային պարկից օդ բարձրանալուց անմիջապես հետո։ Նահանգի զինվորականների և քաղաքացիական պաշտպանության ծառայության նախնական տվյալներով՝ ուղևորների թվում եղել են վենեսուելացի գործարարներ Դոմինգո Արնալդո Ամարո Չակոնը և Գիլյերմո Ալֆրեդո Ամարո Չակոնը, ինչպես նաև Ռաուլ Ֆրագոսան, Մայքլ Բրեդլին և ուկրաինացի մոդել Սոֆիա Կոմարը։ Օդանավը վարել են օդաչուներ Էռնեստո Մասեդան և Խոսե Գոնսալեսը։

Փրկարար ծառայությունների հաղորդմամբ՝ ուղևորները մարմնական վնասվածքներ են ստացել։ Այնուամենայնիվ, իշխանությունները չեն հայտնում, թե ինչ վիճակում են նրանք և որ բժշկական կենտրոններ են տեղափոխվել։ Ավիավթարի պատճառները պարզվում են։ Նախնական տեղեկություններով՝ ինքնաթիռը Սյուդադ Բոլիվար էր ժամանել վերալիցքավորման նպատակով՝ դեպի Կարակաս ճանապարհը շարունակելուց առաջ։ Քաղաքացիական պաշտպանության ծառայության հրապարակած լուսանկարներում երևում է, որ օդանավի ստորին հատվածը մասամբ այրվել է։

Վենեսուելական ԶԼՄ-ների առանձնահատուկ ուշադրությանն են արժանացել եղբայրներ Ամարո Չակոնների ինքնությունը։ Ինչպես ավելի վաղ Mapas de Poder հետաքննչական նախագծի շրջանակում հայտնել էր El Pitazo-ն, նրանք ներգրավված են Իսպանիայում ընթացող մի դատական գործում, որը կապված է այդ երկրի նախկին վարչապետ Խոսե Լուիս Ռոդրիգես Սապատերոյի հետ։

Հետաքննության համաձայն՝ Ամարո եղբայրները կապված են առևտրային ընկերությունների, ֆինանսական գործարքների, ինչպես նաև նավթարդյունաբերության, ոսկու արդյունահանման և ագրոբիզնեսի ոլորտներում ծավալած գործունեության հետ։ Լրագրողների ուսումնասիրած փաստաթղթերում նկարագրվում է մի ցանց, որը միմյանց էր կապում Կարակասը, Շվեյցարիան, Ֆրանսիան, ԱՄՆ-ն, Պանաման և Մադրիդը։

Ամարո Չակոն եղբայրների անունները հիշատակվել են նաև Տնտեսական և ֆինանսական հանցագործությունների քննության իսպանական Udef ստորաբաժանման զեկույցներում։ Գործի նյութերի համաձայն՝ նրանց հետ կապված ընկերությունները կարող էին միլիոնավոր եվրոներ փոխանցել կանոնադրական կապիտալի ավելացման միջոցով, ինչն էլ հարուցել էր Իսպանիայի իշխանությունների կասկածը։ Հետաքննության մեջ նշվում է, որ այդ միջոցների մի մասը, ըստ ամենայնի, հայտնվել է Սապատերոյի մերձավոր շրջապատի հետ կապ ունեցող ընկերություններում։ Միևնույն ժամանակ, գործով անցնող անձինք չեն պատասխանել El Pitazo-ի՝ հրապարակված մեղադրանքների ու փաստաթղթերի վերաբերյալ մեկնաբանություն տալու հարցմանը։