Առաջարկել են պաշտոնական փաստաթղթերում ամուսնալուծված լինելու փաստն այսուհետև չնշել

Շվեյցարիայի կառավարությունը հանդես է եկել «ամուսնալուծված» քաղաքացիական կարգավիճակը վերացնելու օգտին և աջակցել է Լիբերալ ազատ ժողովրդավարական կուսակցության պատգամավոր Նադին Գոբեի համապատասխան նախաձեռնությանը, հաղորդում է dpa-ն։

Ըստ գործող կանոնների՝ ամուսնությունը լուծարած անձինք պաշտոնական փաստաթղթերում և ձևաթղթերում, այդ թվում՝ ամուսնալուծությունից շատ տարիներ անց, պետք է իրենց կարգավիճակը նշեն որպես «ամուսնալուծված»։ Գոբեն նման պահանջը համարել է ավելորդ և առաջարկել է ամուսնալուծված մարդկանց վերադարձնել «չամուսնացած» կամ «ամուրի/չամուսնացած կին» կատեգորիային։

Պատգամավորի կարծիքով՝ ամուսնալուծությունն իրավական հարց է, որը համապատասխան ընթացակարգի ավարտից հետո համարվում է կարգավորված։ Ուստի պաշտոնական փաստաթղթերում դրա մշտական նշումը փաստացի նշանակում է մարդու անձնական կյանքի իրադարձության վարչական ամրագրում։

«Ամուսնալուծությունն իրավական հարց է, որը կարգավորվել է։ Ինքն իրեն ընդմիշտ «ամուսնալուծված» անվանելու պահանջը նշանակում է, որ անձնական իրադարձությունը շարունակում են վարչականորեն արձանագրել»,- հայտարարել է Գոբեն։

Այժմ նախաձեռնությունը պետք է քննարկի Շվեյցարիայի խորհրդարանը։ Հավանության արժանանալու դեպքում պատգամավորներն ու կառավարությունը պետք է օրենսդրության մեջ կատարեն անհրաժեշտ փոփոխությունները։

Առաջարկվող բարեփոխումը վերաբերում է բուն վարչական ընթացակարգերում քաղաքացիական կարգավիճակի նշմանը և չի ենթադրում ո՛չ ամուսնության լուծարման փաստի, ո՛չ դրա հետ կապված իրավական հետևանքների վերանայում։