Նավթի գինը չորս ամսվա ընթացքում առաջին անգամ շաբաթը կփակի 100 դոլարից բարձր

Նավթի համաշխարհային գները պատրաստվում են շաբաթն ավարտել մեկ բարելի դիմաց 100 դոլարից բարձր մակարդակում՝ առաջին անգամ մայիսի կեսերից ի վեր։ Reuters-ի տվյալներով՝ գնաճի հիմնական պատճառը Մերձավոր Արևելքում լարվածության սրացումն ու առանցքային ծովային երթուղիներով մատակարարումների խափանման վտանգն է։

Ուրբաթ Brent տեսակի նավթի գինը կազմել է մոտ 105,99 դոլար, իսկ ամերիկյան WTI-ն՝ 101,20 դոլար մեկ բարելի դիմաց։ Չնայած օրվա ընթացքում արձանագրված անկմանը՝ երկու տեսակների գներն էլ շաբաթվա կտրվածքով աճել են ավելի քան 10%-ով՝ գրանցելով հուլիսի կեսերից ի վեր ամենամեծ շաբաթական աճը։

Շուկայի վրա ճնշում են գործադրում Հորմուզի նեղուցում սահմանափակված նավագնացությունը, տարածաշրջանում նավերի վրա հարձակումները և Եմենից հութիների գործողությունների ընդլայնումը։ Վերլուծաբանների գնահատմամբ՝ նավթի գների հետագա ընթացքը մեծապես կախված կլինի մատակարարումների վիճակից և Չինաստանի պահանջարկից։ Reuters-ի փոխանցմամբ՝ նոր խափանումների դեպքում շուկայում չեն բացառում նավթի գնի հետագա զգալի աճը։