49 տարի առաջ անհետացած 15-ամյա դպրոցականի աճյունը նույնականացվել է

ԱՄՆ-ում նույնականացվել է 15-ամյա Սինդի Բլիզարդի աճյունը, որը 49 տարի առաջ փախել էր տնից և անհետ կորել։ Այս մասին հայտնում է People-ը։

Աղջկա կմախքացած աճյունը հայտնաբերվել էր 1977 թվականի դեկտեմբերի 29-ին՝ Հյուսիսային Կարոլինայի Ուիլսոն շրջանում գտնվող անտառապատ տարածքում։ Դատաբժշկական փորձաքննությամբ այն ժամանակ պարզվել էր, որ աճյունը պատկանում է 16-23 տարեկան աղջկա։ Քննիչները նաև ենթադրել էին, որ նա մեծ հավանականությամբ բռնի հանցագործության զոհ է դարձել, սակայն նրա ինքնությունը պարզել չէր հաջողվել։

2010 թվականին մասնագետները կազմել էին աղջկա ԴՆԹ պրոֆիլը և այն ներառել համապատասխան տվյալների բազաներում, սակայն արդյունք չէր եղել։ Գործում առաջընթաց է գրանցվել միայն 2024 թվականին, երբ հետաքննությունը վերսկսել է Հյուսիսային Կարոլինայի Հետաքննությունների բյուրոյի աշխատակից Էնդի Մարրուն։ ԴՆԹ-ի խորացված հետազոտության արդյունքում 2026 թվականի սեպտեմբերի 8-ին ոստիկանությունը հայտարարել է, որ աճյունը պատկանում է Սինդի Բլիզարդին։

Պարզվել է, որ Սինդին 1977 թվականի գարնանը փախել էր Մերիլենդ նահանգի Մոնքթոն բնակավայրում գտնվող իր տնից։ Այն գտնվում է աճյունի հայտնաբերման վայրից մոտ 280 կմ հեռավորության վրա։ Թե ինչ է տեղի ունեցել աղջկա հետ անհետանալուց հետո և ինչպես է նա մահացել, առայժմ հայտնի չէ։