Պուտինը մեկնում է Հնդկաստան․ ի՞նչ են քննարկելու Մոդիի հետ

Ռուսաստանի նախագահ Վլադիմիր Պուտինը սեպտեմբերի 11-13-ը կայցելի Հնդկաստան, որտեղ կմասնակցի ԲՐԻԿՍ-ի գագաթնաժողովին և հանդիպում կունենա Հնդկաստանի վարչապետ Նարենդրա Մոդիի հետ։ Այս մասին հայտնում է Gazeta.Ru-ն՝ հղում անելով ՌԴ նախագահի օգնական Յուրի Ուշակովին։

Բանակցությունների առանցքային թեմաներից կլինեն երկու երկրների տնտեսական և ռազմատեխնիկական համագործակցությունը։ Հնդկաստանում ակնկալում են, որ այցը նոր խթան կհաղորդի ռազմավարական գործընկերությանը։ Մոսկվան և Նյու Դելին նպատակ ունեն մինչև 2030 թվականը երկկողմ ապրանքաշրջանառությունը հասցնել 100 մլրդ դոլարի։ Կողմերը կարող են քննարկել նաև էներգետիկան, տիեզերական ոլորտը, համատեղ ներդրումներն ու ռազմական համագործակցությունը։

ET Government-ի փոխանցմամբ՝ Պուտինն ու Մոդին, ամենայն հավանականությամբ, կանդրադառնան նաև միջազգային օրակարգին, այդ թվում՝ ուկրաինական հակամարտության կարգավորման հարցին։ Մինչ այցը Կրեմլի խոսնակ Դմիտրի Պեսկովը հայտարարել էր, որ Ռուսաստանը պատրաստ է Հնդկաստանին սպառազինություն մատակարարել։

Փորձագետները նշում են, որ չնայած Ռուսաստանի մասնաբաժինը Հնդկաստանի սպառազինության շուկայում վերջին տարիներին նվազել է, Նյու Դելին շարունակում է հետաքրքրված լինել ռուսական ռազմական տեխնիկայով։ Միաժամանակ երկու երկրների առևտրում պահպանվում է զգալի անհավասարակշռություն․ դրա մեծ մասը կազմում է ռուսական արտահանումը, առաջին հերթին՝ նավթը։

Հնդկաստանը շարունակում է տնտեսական և էներգետիկ կապերը Ռուսաստանի հետ՝ չնայած ԱՄՆ-ի և արևմտյան երկրների ճնշմանը։ Փորձագետների գնահատմամբ՝ Պուտինի այցը հնարավորություն կտա Մոսկվային և Նյու Դելիին համադրել դիրքորոշումները և քննարկել հարաբերություններում կուտակված հարցերը։