Նարկոլոգը նշել է կենցաղային ալկոհոլիզմի հիմնական նշանները

Ալկոհոլի նույնիսկ փոքր չափաբաժինների կանոնավոր օգտագործումը կարող է կախվածության մասին վկայող տագնապալի ազդանշան լինել։ Այս մասին «Лента.ру»-ի հետ զրույցում ասել է հոգեբույժ-նարկոլոգ Մարինա Կալյուժնայան։

Մասնագետի խոսքով՝ կարևոր է ոչ այնքան օգտագործված ալկոհոլի քանակը, որքան դրա հաճախականությունն ու մարդու վերաբերմունքը խմիչքի նկատմամբ։ Եթե մարդն ամեն երեկո թեկուզ փոքր քանակությամբ ալկոհոլ է օգտագործում և արդեն դժվարանում է առանց դրա, դա կարող է խնդրի մասին վկայել։

Կախվածության մյուս հնարավոր նշաններից են հարկադրված սթափության օրերին դյուրագրգռությունը և ալկոհոլի մասին կպչուն մտքերը, դրա նկատմամբ դիմադրողականության աճը, խմելու վերաբերյալ դիտողություններին ագրեսիվ արձագանքելը և ալկոհոլ օգտագործելու համար անընդհատ առիթներ փնտրելը։

Բժշկի խոսքով՝ մտահոգիչ է նաև այն իրավիճակը, երբ մարդը սկսում է իր առօրյան հարմարեցնել խմելուն՝ հրաժարվելով այն հանդիպումներից, որտեղ ալկոհոլ չի լինելու, կամ նյարդայնանալով, երբ ինչ-որ բան խանգարում է իր սովորական «խմելու ծեսին»։