Գիտնականները խաղողի մեջ Պարկինսոնի հիվանդության զարգացումը դանդաղեցնող նյութ են հայտնաբերել

Ռուս գիտնականները «Ալֆա» տեսակի խաղողի մեջ հայտնաբերել են բնական միացություն՝ տրանս-վիտիզին B, որը փորձարկումների ընթացքում կարողացել է պաշտպանել նյարդային բջիջները Պարկինսոնի հիվանդության դեպքում։ Այս մասին հայտնել է Ռուսաստանի գիտությունների ակադեմիայի Հեռավորարևելյան բաժանմունքի Խաղաղօվկիանոսյան կենսաօրգանական քիմիայի ինստիտուտը։

Մկների վրա անցկացված փորձերի ժամանակ նյութը բարելավել է շարժողական գործառույթներն ու տարածական հիշողությունը, ինչպես նաև նպաստել դոֆամին արտադրող նեյրոնների պահպանմանը։ Հետազոտողները պարզել են նաև, որ տրանս-վիտիզին B-ն նվազեցնում է նյարդային համակարգում բորբոքային գործընթացները և օգնում բջիջներին պահպանել սպիտակուցային հավասարակշռությունը։

Գիտնականները նշում են, որ ստացված արդյունքները կարող են նոր ուղղություն բացել Պարկինսոնի հիվանդության բուժման մեթոդների որոնման համար։ Միաժամանակ հետազոտությունն առայժմ նախակլինիկական փուլում է՝ փորձերն իրականացվել են մկների վրա, ուստի դեռևս հաստատված չէ, որ նյութը նույն ազդեցությունը կունենա մարդկանց մոտ։ Հետազոտությունները շարունակվելու են այլ փորձարարական մոդելների վրա։