Լիլիթ Գալստյանը հայ ռազմագերիների իրավունքների պաշտպանության հարցով դիմել է ՄԻՊ Անահիտ Մանասյանին

Մարդու իրավունքների և հանրային հարցերի հանձնաժողովի նախագահ Լիլիթ Գալստյանը պաշտոնական նամակով դիմել է ՀՀ մարդու իրավունքների պաշտպան Անահիտ Մանասյանին՝ Ադրբեջանում պահվող հայ ռազմագերիների իրավունքների պաշտպանության վերաբերյալ պարզաբանումներ ստանալու նպատակով։

Գալստյանը նշել է, որ Բաքվում պահվող հայերի իրավունքների խախտումների և խոշտանգումների վերաբերյալ ահազանգերը շարունակում են մտահոգիչ մնալ։ Նա անդրադարձել է նաև Արցախի Հանրապետության ԱԺ նախկին նախագահ Դավիթ Իշխանյանի, Ռուբեն Վարդանյանի և Դավիթ Բաբայանի կողմից բարձրաձայնված խնդիրներին։

Մասնավորապես, Գալստյանը ՄԻՊ-ից հետաքրքրվել է, թե իր լիազորությունների շրջանակում ինչ գործողություններ են իրականացվել հայ գերիների իրավունքների պաշտպանության ուղղությամբ, ինչ խնդիրներ են բարձրաձայնվել Ադրբեջանի մարդու իրավունքների պաշտպանին ուղղված գրություններում և ինչ արձագանք է ստացվել։

Նա նաև հարցրել է՝ նախատեսվո՞ւմ է արդյոք դիմել Ադրբեջանի ՄԻՊ-ին՝ հայ գերիներին դատական ակտերը տրամադրելու և նրանց հիմնարար իրավունքների երաշխավորման ուղղությամբ քայլեր ձեռնարկելու համար, ինչպես նաև ինչ քայլեր են իրականացվել միջազգային համագործակցության շրջանակում և ինչ արդյունքներ են արձանագրվել։

Գալստյանը նշել է, որ Դավիթ Իշխանյանը սեպտեմբերի 9-ի ուղերձում հայտնել է, որ չի ստացել Բաքվի ռազմական դատարանի վճիռները, այդ թվում՝ ադրբեջաներեն տարբերակը։ Նրա խոսքով՝ 2025 թվականի օգոստոսի 22-ից Դավիթ Իշխանյանը և մյուս հայ գերիները չեն կարողանում լիազորագիր տրամադրել Հայաստանում իրենց վստահված անձանց։

Գալստյանը նամակում հղում է արել նաև ՄԱԿ-ի Խոշտանգումների դեմ կոմիտեի, ԱՄՆ միջազգային կրոնական ազատությունների հանձնաժողովի և միջազգային իրավունքի համապատասխան դրույթներին՝ ընդգծելով հայ գերիների իրավունքների պաշտպանության անհրաժեշտությունը։