Կրեմլում մեկնաբանել են G20-ի գագաթնաժողովին Պուտինի հնարավոր մասնակցությունը

Ռուսաստանի նախագահ Վլադիմիր Պուտինի՝ G20-ի գագաթնաժողովին մասնակցելու հնարավորությունը դեռևս չի քննարկվել։ Այս մասին «Известия»-ին հայտնել է ՌԴ նախագահի օգնական Յուրի Ուշակովը։

Նրա խոսքով՝ փորձագիտական մակարդակով նախապատրաստական աշխատանքները շարունակվում են, և ռուս մասնագետներն աշխատում են առաջիկա գագաթնաժողովի փաստաթղթերի վրա։ «Ինչ վերաբերում է Պուտինի հնարավոր այցին, ապա այդ հարցը մեզ մոտ դեռ նույնիսկ չի քննարկվել», — ասել է Ուշակովը։

Նա նաև նշել է, որ Մոսկվայի և Վաշինգտոնի ներկայացուցիչների միջև աշխատանքային շփումները շարունակվում են՝ բարեկամական և կառուցողական մթնոլորտում։

Ավելի վաղ հաղորդվել էր, որ Պուտինը հրավեր է ստացել մասնակցելու G20-ի գագաթնաժողովին, որը նախատեսվում է անցկացնել դեկտեմբերին Մայամիում։