Կառավարությունը կշարունակի փոխհատուցել արցախցի ուսանողների ուսման վարձը

ՀՀ ԿԳՄՍՆ բարձրագույն կրթության և գիտության կոմիտեն հանրային քննարկման է ներկայացրել կառավարության որոշման նախագիծ, որով առաջարկվում է շարունակել Արցախից տեղահանված ուսանողների ուսման վարձի փոխհատուցման ծրագիրը։

Նախագծով նախատեսվում է ուսման վարձի փոխհատուցում տրամադրել 2026-2027 ուսումնական տարում Հայաստանի բարձրագույն և մասնագիտական ուսումնական հաստատություններ ընդունված և առաջին կուրսում սովորող՝ Արցախից տեղահանված ընտանիքների շուրջ 500 ուսանողի։

Նախնական հաշվարկներով՝ ծրագրի իրականացման համար անհրաժեշտ կլինի 225 մլն դրամ։ Դրանից 112.5 մլն դրամը նախատեսվում է հատկացնել 2026 թվականին, ևս 112.5 մլն դրամ՝ 2027 թվականին։

Ծրագրի շահառուները ուսման վարձի փոխհատուցում կստանան նախորդ կիսամյակի արդյունքում սահմանված միջին որակական գնահատականի 75 տոկոսը հաղթահարելու դեպքում։

Նշվում է, որ 2023-2024, 2024-2025 և 2025-2026 ուսումնական տարիներին ծրագրից օգտվել է շուրջ 1500 շահառու, որոնց ուսման վարձի փոխհատուցման համար 2023-2026 թվականներին հատկացվել է շուրջ 1.8 մլրդ դրամ։